Harrojeni Komisionin Beccheti, Rama: Lulzim, mos klith si ai i “Foltores”!

Pas fjalës së liderit të opozitës fjalën e mori Kryeministri Edi Rama duke e nisur me leksion etike pas përplasjes së Lulzim Bashës me deputetin socialist, Eduard Shalsi, të cilin e cilësoi “plehrë, fundërrinë…”, për vazhduar me sqarimin për 200 milionë eurot borxh për shpenzimet e OSHEE, përsëriti fjalët e Taulant Ballës pse nuk do të lejoj ngritjen e Komisionit Hetimor për çështjen “Beccheti”, dhe në fund duke ju drejtuar Bashës se është hallexhi, i sugjeroi që vetëm një gabim mos ta bëj, që të hyjë në garë me atë të “Foltores”, pra, Sali Berishën.

Kështu Kryeministri Rama e nisi fjlaën e tij duke shprehur keqardhje për gjuhën e përdorur nga Basha, duke i thënë që të mos imitojë “Foltoren” dhe të mos klith si Ish-Presidenti Sali Berisha.

“Së pari, një shprehje keqardhje për atë lokorenë, në vend të mirëmëngjesit. Pas ardhjes i fundit këtu, z. Lulzim, dhe ta kam thënë disa herë publikisht, por edhe personalisht, mos imito ato të foltores, sepse origjinali është gjithmonë më i besueshëm se kopja. Sa më shumë klith, si ai i foltores, aq më shumë dukesh personazhi i qajtores. Një burrë që vë kujën me fjalë të cilat si prind u thua përditë fëmijëve të tu se nuk përdoren asnjëherë, dhe e bën këtë në mes të 139 burra e grave të tjerë dhe në sy të kushedi sa tjerëve që na ndjekin, është një burrë në pikë të hallit. Megjithatë, hallin që ke sado ta qajmë nuk ta zgjidhim dot,” tha Rama dhe vazhdoj me akuzat që u thanë për raportin e FMN nga i cili gjeti një kryeradhë për të cituar:

“Ekonomia e Shqipërisë ka treguar një qëndrueshmëri të konsiderueshme pas tërmetit dhe pandemisë. Pas vitit të vështirë 2020 aktiviteti ekonomiko po ringrihet fuqishëm!”

Pasi u bind se u “pastrua” nga kritikat e misionit të FMN-së, Kryeministri Edi Rama vazhdoi duke mohuar akuzat e kryetarit të Partisë Demokratike, Lulzim Basha, për 200 milionë euro të marra borxh për të përballuar shpenzimet e OSHEE për rritjen e çmimit të energjisë, pasi sipas tij kemi të bëjmë për një instrument si garanci sovrane për të mbrojtur shqiptarët nga rritja e çmimit të energjisë.

“Pas një periudhe kontraktimi me 4% në vitin 2020 e cila ishte shumë më pak se parashikimi fillestar, ekonomia po rritet fuqishëm me rritje të parashikuar 7.8 % për 2020-ën, nxitur nga mbështetja e vazhdueshme e politikave fiskale nga rindërtimit. Kjo është FMN. Shqip dhe anglisht. Më tutje përsëritet prapë, se është e njëjta gjë që bën, përsëri të njëjtën gjë që kur ke hyrë kryetar i opozitës. Përsërit dhe përsërit si përsëritës, duke iu thënë shqiptarëve se kemi marrë 200 mln borxhe, ndërkohë që para një jave iu the se u rrit çmimi i energjisë.

E the dhe sot: ‘Ka dalë tellalli të lajmërojë një krizë që nuk ekziston’. Sot nuk përmende se çmimet janë rritur vetëm në Shqipëri, se çmimet janë rritur kudo. Në Kosovë, Maqedoni, deri në Amerikë, çmimet janë rritur. Gjithë bota flet për një krizë, që është globale, dhe jo lokale. E të mëdhenjve dhe të vegjëlve. Është detyra ime t’ju flas hapur njerëzve dhe sidomos kur i gjithë vendi do përballet me një krizë të kësaj natyre. Çmimi për konsumatorët familjarë dhe as për të tjerët hë për hë nuk u rrit. Ça do të thotë kjo? Se nuk ka krizë?! Ka krizë dhe madje ka një krizë të atillë dhe këtu jemi do e shohim në ditët në vijim,” tha Rama që përveç etikës sot ishte disponibël të jap dhe leksione ekonomie:

“Jo vetëm çmimi i energjisë është rritur, po problemi me të cilin po përballen vendet është mungesa e ofertës përballë kërkesës. Mund të paguash edhe më shumë, por s’mund ta gjesh. Ato 200 mln euro nuk janë borxh, por instrument garancie sovrane, për të mbrojtur shqiptarët dhe jo për të faturuar ata. Për të bërë të mundur që ajo kosto e rritur mos të shkojë në xhepat e tyre. ne po përgatitemi, shumë shpejt do të bëjmë konstruktim me shqiptarët se kush do e mbajë barrën dhe se si do të shpërndahet ajo.”

Ndonëse e tjerri shumë dhe madje debatoi me deputetët e opozitës që reagonin nga ulëset e tyre, Kryeministri Edi Rama e bëri të qartë se Komision Hetimor për çështjen “Becchetti” nuk do të ngrihet kurrsesi ndërsa akuzoi deputetët e PD se po shpallin hero një person në kërkim ndërkombëtar.

“Mund të ma tregoni vendimin për Becchetin, vendimin me të cilin ju jeni njohur. Nuk ka asnjë njohje të publikut me këtë vendim nga Gjykata përkatëse, madje kjo që bëni ju konsiderohet vepër penale. Vendimi i cituar i referohet një vendimi konfidencial, jo sipas meje apo nesh, por sipas vetë gjykatës. Tani, se si në prill 2021 u njoh opinioni, me një vendim që mbulohet nga konfidencialiteti jo i qeverisë shqiptare, por konfidencialiteti i akorduar nga Gjykata Ndërkombëtare, këtë e dini ju. Nuk e them për të trembur, por e them pse nuk bëhet ky Komision. Prandaj, ju në radhë të parë, në kërkesën tuaj nuk shpjegoni burimin zyrtar publik. Ku është? Burimi zyrtar publik është gjykata. Kërkesa juaj thotë se është e qartë që Shqipëria tani do paguajë,” tha Rama duke vazhduar ndonëse deputetët e PD ndërhynë:

“Tani, të dilni ju këtu, e të pretendoni të korrektoni fjalët që them unë, ndërkohë që zotëria është autokontroll dhe askush nga ne nuk pretendon t’i bëjë thirrje të kontrollohet, tani më lini të mbaroj. Sa keni folur ju, unë habitem pse e keni këtë problem. Unë jam i gatshëm të votoj bashkë me ju, që ju të flisni sa të doni, gjithë javën. Unë jam votë me ju, të flisni sa të doni, jo 10 minuta, po gjithë javën, të krijoni këtu dhe një shtëpi të dytë, para se të vijë foltorja te shtëpia e parë.”

Pasi akuzoi demokratët se po dezinfrmojnë ai shprehu sërish keqardhje për Bashën, të cilit i tha se nuk i shton hallet meqë është hallexhi.

“Ju dezinformoni duke hapur një dokument që është i mbuluar nga konfidencialiteti duke shpikur se; shteti shqiptar ka nisur që të paguaj, ky është krejtësisht jo e vërtetë. Ju doni një komision që shkel parimet dhe dëmton interesat e Shqipërisë. Po ju kujtoj se konfidencialiteti i këtyre proceseve është detyrues për Shqipërisë, dhe duhet të jetë detyrues për të zgjedhurit e popullit shqiptar, s’po them për Qimi.net. Parlamenti duhet të jetë detyrues. Bie tërmet, ju jeni me tërmetin, vjen virusi, jeni me të, ka një krizë energjetike, jeni me të, tani na dolët aleatë dhe me këtë. Unë nuk jam fare fare fare i asaj shtëpie prodhimi, i gramafonit se për çdo gjë thotë; e ke bërë për këtë arsye. S’po them se i keni marrë ndonjë kaush me fara luledielli këtij dhe po i hani. S’po e them. S’po hy në këto. Lulzim, Lulëzim, ta kam thënë se unë hallexhinjve nuk i shtoj hallet. Je hallexhi sot. Unë po të ndjek.”

Në fund, duke e garantuar Lulzim Bashën se nuk bëhet dot si Sali Berisha i tha që mos hyjë në garë me të:

“Më vonë kemi kohë prapë. Ti je hallexhi, por vetëm një gabim mos bëj që të hysh në garë me atë të ‘foltores’, se e bën gojën qenef. Mos e bëjë këtë. Se në atë fushë është më i mirë se ty. Ai është origjinali, ti kopja. Për qenef ai është botërisht. Ti mos bëjë konkurrencë qenef me qenef se nuk je. Je shumë pllakë majolike për të qenë si ai. E fundit që kam. Komisionin në fjalë ju duhet ta harroni, se komisioni në fjalë nuk bëhet. Kush në krye ku, kjo është pjesa juaj. Unë nuk përzihem. Meqe kam dhe një dobësi, mbase çështje moshe, duke qenë pak më i madh se Lulëzimi, ia kam thënë dhe personalisht; mos imito atë, se re në gropë. Si ai nuk bëhesh dot dhe mos u bë kurrë. Ji në lartësinë e flokëve të krehura dhe në lartësi të kostumit, mos e prish gojën si sot. Je dalluar që i fsheh mirë ato që mendon, por jo me gojë, të lutem! Nuk mundet dot që të bëhesh ti goja më e shthurur e këtij parlamenti.”