Hartohet Udhëzimi Administrativ për largimin e kryetarëve në komuna

Ministria e Administrimit të Pushtetit Lokal ka përfunduar hartimin e Udhëzimit Administrativ për iniciativën e qytetarëve për largimin e Kryetarit të Komunës nga funksioni.

“Udhëzimi ka për qëllim përcaktimin e procedurës së inicimit, organizimit dhe dorëzimit të iniciativës së qytetarëve për largimin e kryetarit të komunës nga funksioni, në pajtim me Ligjin Nr.03/L-040 për Vetëqeverisjen Lokale,” ka bërë të ditur sot ministri i Administrimit të Pushtetit Lokal, Elbert Krasniqi.

Pjesë e diskutimeve, punës dhe konsultimeve profesionale e edhe e grupit punues, ka sqaruar Elbert Krasniqi përmes rrjetit social Facebook, ishin institucionet vendore dhe ato ndërkombëtare.

“Ky udhëzim jep mundësinë e zbatimit praktik të një të drejtë të garantuar nga ligji për vetëqeverisje lokale. E drejtë kjo që siguron ushtrimin e vullnetit qytetar në raport me Kryetarin e Komunës, të cilin e zgjedhin drejtpërdrejtë vetë qytetarët.”