Hashim Thaçi në Hagë, Avdullah Hoti në Mini Shengen me Edi Ramën
Presidenti i Kosovës, Hashim Thaçi, përfundoi në Hagë ku po përballet me akuzat serbe të dala nga goja e Gjykatës Speciale ndërkohë Kryeministri Avdulla Hoti nesër pritet të jetë pjesë e konferencës online e Mini Shengenit ku do të marrin pjesë kryeministri i Shqipërisë, Edi Rama, ai i Maqedonisë së Veriut, Zoran Zaev, dhe i Serbisë, Ana Bërnabiç.
Ndonëse në mediat serbe ishte raportuar se Avdullah Hoti nuk ka marrë ftesë që të jetë pjesë e kësaj konference, Zyra e Kryeministrit të Kosovës sot e ka përgënjeshtruar këtë lajm. Zëdhënësja e Qeverisë, Antigona Baxhaku, tha se Hoti e ka pranuar ftesën për të qenë pjesë e kësaj konference para 10 dite.
“Video konferenca do të mbahet nesër në ora 11:00, pjesë e saj do të jetë edhe kryeministri Hoti. Nuk e di se çfarë raportojnë mediat serbe por mund të konfirmojë se Hoti ka pranuar ftesë për këtë konferencë më datën 30 të muajit të kaluar pas takimit të krerëve të tri shteteve tjera pjesëmarrëse,” tha zëdhënësja e Qeverisë, Antigona Baxhaku, e cila nuk kishte detaje tjera rreth kësaj konference.
Ndryshe, një takim online në kuadër të nismës Mini Shengen, të ideuar nga Presidenti i Serbisë, Aleksandar Vuçiç, u mbajt edhe gjatë javës së shkuar, mirëpo Kosova nuk kishte ftesë për të qenë pjesë e saj.
