“Hashimi n’Shqipëri merr Behgjetin”, MPB: Thaçi shkeli protokollin, Pacolli të tregojë vendndodhjen
Ushtruesi i detyrës i ministrit të Punëve të Brendshme, Xhelal Sveçla, tha se presidenti i Kosovës, Hashim Thaçi, ka shkelur protokollin shtetëror të martën duke shkuar në Shqipëri duke mos njoftuar Ministrinë e Punëve të Jashtme. Ai tha se nëse del të jetë i vërtetë raportimi se me Thaçin në Kosovë ka hyrë edhe deputeti Behgjet Pacolli, policia do të ndërmarrë masat ndaj kreut të AKR-së.
Xhelal Sveçla në një konferencë për media tha se Thaçit i duhet të tregojë pse ka shkelur protokollin shtetëror, raporton KTV ndërsa ka kërkuar nga Pacolli që menjëherë të dëshmojë vendndodhjen.
“Nuk e ndihmon aspak shtetin asnjë veprim që vë në dyshim rendin dhe sidomos shëndetin publik. Dyshimet që kanë lindur me lëvizjet e z. Pacollit, pra nëse aktualisht personi në fjalë gjendet në Kosovë ka përligjur skenarët që po qarkullojnë kudo. Mbrëmë vonë jam informuar nga ana e policisë kufitare që presidenti i Kosovës ka kaluar kufirin shtetëror pak para orës 18 në drejtim të Shqipërisë. I njëjti është kthyer pak pas orës 19:00. Kur eskorta e presidentit është ndalur, është konstatuar se në veturën e dytë është presidenti. Ai ishte ulur në ulësen e parë përkundër rregullave. Po ashtu policia për shkak të xhamave të zi s’ka mundur të vërejë nëse ka pasur persona të tjerë. Për sqarim, në bazë të ligjit për Protokillion shtetëror çdo lëvizje të presidentit jashtë kufijve duhet të komunikohet te MPJ. Kjo s’është njoftuar,” tha Sveçla duke shtuar:
“Më lejoni të sqaroj se deri më tani s’kemi konfirmim se Thaçi ka qenë i shoqëruar nga Pacolli, por një skenar i tillë nëse del i vërtetë do minonte komplet Republikën dhe do të paraqiste mosrespektim të organeve të rendit. Është vepër penale!”
Ndryshe, janë ngre shumë pikëpyetje për këtë angazhim të sforcuar të Hashim Thaçit për qeverinë e LDK-së deri në futjen ilegale me makinën e tij të Pacollit që dikur e shkarkoi nga Presidenti, ndonëse Thaçi është parë edhe në vilën e Behgjet Pacollit me Edi Ramën kur kryeministër ishte Ramush Haradinaj, për ta bindur këtë të fundit që ta heqë taksën për produktet serbe.
