Hazard vs Neymar, Brazil-Belgjikë, kë favorizojnë bastet…

Brazili – Belgjika, sfidë që pritet me emocione nga tifozët jo vetëm të këtyre shteteve! Cila do të shkojë në gjysmëfinalen e madhe të Kampionatit Botëror – “Rusia 2018”?

Bastet kuotojnë si favoritë Brazilin, megjithatë Belgjika ka ekip të frikshme në krye me Lukakun, Hazard, De Bruyne etj.

Neymar me shokë janë optimistë se do të sigurojnë biletën për më tej, ndërsa belgët shpresojnë në një mrekulli dhe ta rrëzojnë pesë herë kampionin e botës.

Ndeshja do të luhet sonte në orën 20.00 në stadiumin ‘Kazan Arena’. Te Belgjika luan edhe sulmuesi shqiptar, Adnan Januzaj, i cili ka pasur vetëm një paraqitje (86 minuta) dhe kundër Anglisë, ku edhe kishte shënuar golin e fitores me rezultat 1:0.

Brazili ka pasur rrugë jo aq të lehtë deri sa ka arritur në çerekfinale, duke zënë vendin e parë në grupin E me 7 pikë, pasi kishte barazuar 1:1 me Zvicrën, pastaj e mundi me 2:0 Kosta Rikën, me 2:0 Serbinë dhe po ashtu me 2:0 Meksikën në të tetën e finales.

Ndërkaq, Belgjika në grupin G dominoi pa problem duke shënuar tri fitore, në start e mposhti me 3:0 Panamanë, pastaj 5:2 me Tunizinë dhe me 1:0 Anglinë, kurse në të tetën e finales triumfoi në çastet e fundit me 3:2 kundër Japonisë. Belgjika është në presion të Brazilit, kur kihet parasysh se ka disa individë të rrezikshëm si Neymarin, Coutinhon, Firminon, Marcelon etj.

Përzgjedhësi i Belgjikës, Roberto Martinez, nuk ka ndërmend të ndryshojë sistemin e lojës së ekipit të tij, pavarësisht se Brazili e nis si favorit duelin.

“Ne nuk mund ta ndryshojmë mënyrën se si luajmë. Ne jemi një ekip sulmues. Brazili dhe ne jemi të dizejnuar për të shënuar gola dhe për të kërkuar fitore. Ata do të duan të kenë topin. Por, çelësi do të jetë ajo që gjithkush bën me topin. Brazili është një nga skuadrat më favorite të Kupës së Botës dhe kjo na vë në një fazë dhe një rol shumë të ndryshëm. Njëmbëdhjetëshja braziliane ka një bilanc fantastik. Ata mund të luajnë me tre, ose katër sulmues.

Ata kërkojnë thellësinë e kundërshtarit. Por, nëse mentaliteti ynë është si ai ndaj Japonisë, kemi shumë mundësi. Unë tashmë e kam parasysh sistemin e të luajturit ndaj Brazilit. Nuk duhet të bëjmë asnjë gabim. Nëse i jep Brazilit një mundësi, ai është në gjendje të përfitojë prej tij”, thotë Martinez. Futbollisti i Brazilit, Willian, tha se do të japin maksimumin në takim me Belgjikën. Rënia e Casemiros? “Të shohim nëse luan ai, apo Fernandinho, i cili është një opsion. Ata janë dy lojtarë, të cilët e bëjnë Brazilin edhe më të fortë. Luajnë mirë dhe gjithmonë e ndihmojnë ekipin në vështirësi. Ne kemi cilësi për ta zëvendësuar Casemiro”, përgjigjet Willian.

Megjithatë ai flet edhe për duelin që me bashkëlojtarin e tij, Hazard. Willian e Hazard luajnë për Chelseat por sot do të luftojnë kundër njëri-tjetrit. “Kjo do të jetë hera e parë, që luaj kundër tij, pas pesë vitesh bashkë si shokë grupi te Chelsea. Ai është një person shumë i përulur, por është koha që të gjithë të mbrojnë fanellën e kombit të tij dhe kjo është ajo që ne do të bëjmë”, ka thënë Willian.

Futbollisti tha më tutje se në çdo takim jep maksimumin po ashtu zotohet se këtë do ta bëjë edhe kundër belgëve.

“Në çdo ndeshje, unë jap gjithçka. Ndjehem mirë dhe jam shumë i kënaqur me punën time kundër Meksikës. Kjo lojë më ka dhënë më shumë besim dhe unë shpresoj që të luaj edhe më mirë në ndeshjen e ardhshme”, theksoi ai.

Sa i përket Belgjikës e konsideron si rival shumë të fortë: “Ne e dimë se do të jetë një lojë shumë e vështirë, për shkak se Belgjika është një ekip i madh, jo më kot gjendet në çerekfinale. Ne jemi përgatitur shumë mirë, por i njohim ata. Gjithashtu, jemi duke i studiuar në detaje, për të gjetur mënyra të duhura kundërpërgjigjeje. Belgët kanë cilësi dhe ndeshja do të jetë e vështirë”.