Hegseth: Trump ka një hartë të re strategjike nga Groenlanda në Gjirin Amerikan
Sekretari amerikan i Mbrojtjes, Pete Hegseth, tha se Presidenti Donald Trump po ripërcakton strategjinë e sigurisë së Shteteve të Bashkuara në Hemisferën Perëndimore, duke theksuar se Washingtoni po formëson një hartë të re gjeopolitike që përfshin zonën nga Groenlanda deri në Kanalin e Panamasë.
Duke foli në selinë e Komandës Jugore të SHBA-së në Doral të Floridas, në Konferencën Kundër Kartelit të Amerikës, Hegseth paraqiti një vizion më të gjerë të politikës amerikane të sigurisë në Hemisferën Perëndimore.
Fjalimi u mbajt në mes të luftës midis SHBA-së dhe Iranit, por Irani nuk u përmend në të.
Pete Hegseth: "Trump has drawn a new strategic map from Greenland to the Gulf of America – we call this map the Greater North America.
— ᗰᗩƳᖇᗩ (@LePapillonBlu2) March 6, 2026
Every sovereign nation north of the equator is not part of the global south, it is part of the security perimeter in this great neighborhood… pic.twitter.com/WsyrJLjPZF
Harta e re Strategjike e sigurisë amerikane
Duke folur për strategjinë e re amerikane, Hegseth tha se Presidenti Trump po ripërcakton hapësirën e sigurisë së Shteteve të Bashkuara.
“Presidenti Trump ka vizatuar një hartë të re strategjike nga Groenlanda në Gjirin e Amerikës, në Kanalin e Panamasë dhe vendet përreth tij,” tha Hegseth duke shtuar se Pentagoni e quan atë zonë “Amerika e Madhe e Veriut” dhe e konsideron atë një perimetër kyç të sigurisë së SHBA-së.
Sipas tij, të gjitha vendet dhe territoret në veri të ekuatorit – nga Groenlanda në Ekuador dhe nga Alaska në Gujanë – janë pjesë e hapësirës së menjëhershme të sigurisë që Washingtoni duhet të mbrojë.
Një riinterpretim më i gjerë i Doktrinës Monroe
Hegseth tha se strategjia e re mbështetet në një riinterpretim të Doktrinës Monroe të vitit 1823, e cila thotë se fuqitë e huaja nuk duhet të zgjerojnë ndikimin në Hemisferën Perëndimore. Sipas tij, administrata Trump dëshiron të rivendosë këtë logjikë dhe të parandalojë kundërshtarët e SHBA-së të fitojnë ndikim ushtarak ose infrastrukturor në rajon.
Në këtë kontekst, ai paralajmëroi se kontrolli i pikave kryesore tregtare, siç është Kanali i Panamasë, ose prania ushtarake e kundërshtarëve pranë territorit amerikan përfaqësojnë një kërcënim të drejtpërdrejtë për sigurinë e SHBA-së.
Ndryshe, Presidenti Trump ka folur vazhdimisht për dëshirën që Shtetet e Bashkuara të marrin kontrollin e Groenlandës dhe Kanalit të Panamasë, duke argumentuar se të dyja zonat janë kritike për sigurinë kombëtare amerikane.
Deklaratat e Trump në lidhje me Groenlandën dhe Kanalin e Panamasë shkaktuan kritika dhe refuzim nga qeveritë e Danimarkës dhe Panamasë, të cilat theksuan se ishte territori i tyre sovran.
Ushtria kundër karteleve dhe rrjeteve të migracionit
Në fjalën e tij, Hegseth theksoi gjithashtu se ushtria amerikane po merr pjesë gjithnjë e më shumë në luftën kundër karteleve të drogës dhe rrjeteve të kontrabandës, të cilat ai i quajti “organizata narko-terroriste”.
Ai tha se ushtria amerikane është vendosur edhe në kufirin jugor të SHBA-së dhe se Uashingtoni dëshiron të kryejë operacione së bashku me vendet e rajonit kundër rrjeteve kriminale që, sipas tij, po destabilizojnë vendet e Hemisferës Perëndimore.
Në fund, Sekretari amerikan i Mbrojtjes, Pete Hegseth, tha se Shtetet e Bashkuara dëshirojnë një “hemisferë shtetesh sovrane, të sigurta dhe të begata” dhe tha se, nëse është e nevojshme, Washingtoni do të veprojë vetë për të mbrojtur sigurinë dhe interesat e tij në rajon.
