Heineken pushon nga puna 6.000 punëtorë

Prodhuesi holandez i birrës Heineken ka njoftuar se do të shkurtojë deri në 6.000 vende pune, duke e arsyetuar me kushtet sfiduese të tregut dhe rënien e shitjeve të birrës.

Bordi tha se do të përshpejtojë ndjeshëm zbatimin e një plani që synon rritjen e produktivitetit dhe arritjen e kursimeve të konsiderueshme, i cili përfshin shkurtimin midis 5.000 dhe 6.000 vendeve të punës gjatë dy viteve të ardhshme.

“Ne mbetemi të kujdesshëm në pritshmëritë tona afatshkurtra për kushtet e tregut të birrës”, tha CEO Dolf van den Brink.

Shkurtimet nga puna në Evropë

Edhe pse drejtuesit nuk pranuan të specifikonin se ku do të bëhej numri më i madh i shkurtimeve nga puna, Drejtori Financiar Harold van den Broek la të kuptohej se Europa do të ishte objektivi.

“Europa është një pjesë e madhe e biznesit tonë,” tha Van den Broek duke shtuar se rezultatet financiare tregojnë gjithashtu se është shumë e vështirë të arrihet një raport i favorshëm i kostos fikse ndaj totalit në tregun evropian.

“Kompanitë me një pjesë më të lartë të kostove fikse mund të arrijnë fitime më të larta nëse rrisin të ardhurat, por ato duhet t’i mbulojnë rregullisht këto kosto. Një pjesë më e lartë e kostove mund të kufizojë të ardhurat dhe fitimet, por kjo gjithashtu do të thotë shpenzime fikse më të ulëta.

Prandaj, ne po përqendrojmë shumë iniciativa, megjithëse jo ekskluzivisht, në forcimin e biznesit tonë evropian,” tha Drejtori Financiar Harold van den Broek .

Rënie e shitjeve

Heineken shiti 2.4 për qind më pak birrë vitin e kaluar, tregon raporti vjetor. Rënie më të ndjeshme u regjistruan në Evropë dhe Amerikë, përkatësisht me 4.1 për qind dhe 3.5 për qind.

Të ardhurat totale të Heineken në vitin 2025 arritën në 34.4 miliardë euro, duke rënë me 4.4 për qind nga viti 2024. Fitimi neto ishte 2.7 miliardë euro, duke u rritur me 4.9 për qind, duke përjashtuar luhatjet e monedhës, tha kompania.

Van den Brink i habiti të gjithë muajin e kaluar duke vendosur të largohej pas pothuajse gjashtë vitesh në krye të kompanisë, kujton AFP.

Duke pranuar se e kishte udhëhequr Heineken në kohë të trazuara ekonomike dhe politike, ai tha se po largohej me emocione të përziera.

“Prioriteti im në muajt e ardhshëm është ta lë Heineken në pozicionin më të fortë të mundshëm,” tha Drejtori Financiar i Heineken, Harold van den Broek.

Në tetor të vitit të kaluar, birraria njoftoi tashmë mbylljen ose rialokimin e 400 vendeve të punës si pjesë e riorganizimit të selisë së saj në Amsterdam për të përfituar nga teknologjitë e reja, kujton AFP.

Ndryshe, Heineken punëson rreth 87,000 njerëz në të gjithë botën.