Helidon Bushati jep dorëheqje, Basha dhe Amuli mbajnë zyrat pa elektorat

Deri sa Lulzim Basha dhe Xhevdet Amuli vazhdojnë të mbajnë Zyrën e Degës së PD Shkodër ndonëse nuk kanë elektorat sot Drejtuesi i Politik për Qarkun Shkodër, Helidon Bushati, pas një reflektimi të thellë rreth situatës politike dhe zhvillimeve në PD, ka dhënë dorëheqje.

“Mendoj se me këtë tërheqje timen, krijohen mundësi për energji dhe impulse që do t’i shërbenin PD me synim përbashkimin. E po ashtu, hapen shanse për promovimin e emrave të rinj. Do të vazhdoj padyshim të jem përfaqësues dhe deputet i Partisë Demokratike dhe do të mbroj deri në fund interesat e qytetarëve të Shkodrës e në veçanti të mbështetësve tradicionalë e historikë të së djathtës,” shprehet Helidon Bushati përmes në dorëheqjen e tij e publikuar me arsyetim përmes rrjetit social Facebook ndërsa e pranon se PD po kalon momente të vështira ndonëse është i bindur se demokratet do të dinë të bashkohen shpejt, e të ringrihen së bashku.

Pas kësaj dorëheqje, Lulzim Basha falënderon Helidon Bushatit por shpërfill reflektimin real rreth situatës së krijuar nga Bushati dhe vazhdon me politikën e tij laboratorike duke shpreh bindjen se me drejtimin e ri politik, Partia Demokratike në Qarkun e Shkodrës do të jetë bastion i fuqishëm i PD dhe në krye të fitores së PD në gjithë Shqipërinë.

“Duke e konsideruar qarkun Shkodër si një nga qarqet më të rëndësishme për Partinë Demokratike, Kryetari i Partisë Demokratike ka vlerësuar se qarku Shkodër ka të domosdoshme drejtimin nga një funksionar i lartë i PD dhe ka zgjedhur si Drejtues Politik të qarkut Shkodër, Nënkryetarin e PD dhe Kryetarin e Grupit Parlamentar z. Enkelejd Alibeaj,” shprehet PD në reagimin e saj duke dhënë të paktën një sinjal shpresdhënës:

Kur iku Nënkryetari i PD dhe Kryetari i Grupi Parlamentar, Alfred Rushaj, Lulzim Basha e zëvendësoi me Enkelelejd Alibeajn. Sot iku Helidon Bushati nga Drejtuesi Politik i PD për Qarkun Shkodër dhe ai e zëvendësoi me Enkelejd Alibeajn. Tani ka ngelur që vetëm Lulzim Basha të ikë dhe të zëvendësohet me Enkelejd Alibeajn!

Statusi i plotë:
Pas një reflektimi të thellë rreth situatës politike dhe zhvillimeve në PD, kam marrë vendimin për t’u tërhequr nga roli i Drejtuesit Politik për Qarkun e Shkodrës. Këtë qëndrim, e kam komunikuar me drejtuesit e PD, përpara kësaj shpallje.

PD po kalon momente të vështira por unë jam i bindur se demokratet do të dinë të bashkohen shpejt, e të ringrihen së bashku.

Çfarë i afron sot anëtarët e familjes sonë të madhe politike me njëri-tjetrin është shumë më e madhe se ajo që i ndan, dhe sidomos nevoja jetike që ka vendi për një përballje të fortë me regjimin e mandatit të tretë.

Mendoj se me këtë tërheqje timen, krijohen mundësi për energji dhe impulse që do t’i shërbenin PD me synim përbashkimin. E po ashtu, hapen shanse për promovimin e emrave të rinj. Do të vazhdoj padyshim të jem përfaqësues dhe deputet i Partisë Demokratike dhe do të mbroj deri në fund interesat e qytetarëve të Shkodrës e në veçanti të mbështetësve tradicionalë e historikë të së djathtës.

Ndihem çdo ditë i bekuar nga përkrahja që kam marrë dhe marr prej tyre.

Dua të falenderoj përzemërsisht, të gjithë banorët e qarkut Shkodër, demokratët e palodhur, drejtuesit e strukturave dhe bashkëpunëtorët e mi të afërt për besimin dhe mbështetjen e pakursyer përgjatë këtij rrugëtimi. Një besim që do bëj gjithçka për ta shpërblyer. Asnjë post, përgjegjësi e karrierë, nuk vlen sot më shumë se sa analiza, dhe shikimi në sy e me përulësi i realitetit.

Për PD dhe interesat e saj, nuk është hera e parë që unë bëj një hap të tillë, duke lënë në plan të dytë ambicien personale. Bindja ime e palëkundër është se PD dhe demokratët e meritojnë të japësh për ta.