Helmimi i nxënësve në Fier, mjeku toksikolog sqaron situatën, policia shoqëron…

Pas helmimit të dhjetëra nxënësve në shkollën e mesme “Janaq Kilica” në Fier, të cilët më pas janë paraqitur edhe në Spitalin Rajonal të qytetit, me simptoma të ndryshme, dhe deklaratave të policisë, ministrisë dhe Partiosë Demokratike lidhur me këtë helmim të përsëritur, për situatën e krijuar ka folur dhe mjeku toksikolog Lulzim Banushi, ndërkohë Policia e Shtetit deklaron se ka arrestuar nxënësin që dyshohet se helmoi gjimnazistët fierak.

“Nxënësit kanë pasur simptoma si lotim i syve, kolla, me vështirësi në frymëmarrje, por në tërësi rastet nuk kanë qenë të rënda. Janë raste nën mesataren, jo intonksinuar rëndë. Kjo është një lloj lënde që jep efekte negative tek rrugët e frymëmarrjes, si lotimi i syve, teshtima etj. Por janë simptoma që nuk kanë rrezik për jetën. Jo të gjithë pacientët e paraqitur ishin të intoksikuar, për arsye se një pjesë e tyre ishin edhe me shqetësime psiko-emocionale, gjendje stresi dhe ankthi, ndoshta të krijuara edhe nga momenti. Pacientët kanë probleme me gjendjen psiko-emocionale dhe duhet të qetësohen deri në fund,” tha për BW doktor Banushi.

Ndërsa, drejtoresha e Spitalit Rajonal të Fierit, Nevila Shuke deklaroi se nxënësit kanë paraqitur simptoma ankthi, por se situata e tyre sa vjen e po përmirësohet.

“Nxënësit e parë në Spitalin e Fierit janë paraqitur rreth orës 11.00. Janë paraqitur 30 nxënës. Më pas ka vazhduar numri tek 50 nxënës dhe 10 rastet e fundit kanë ardhur më shumë me simptoma ankthi dhe gjithsej janë afërsisht 60 pacientë, 2 mësuese dhe 58 nxënës. Aktualisht 14 nxënës janë në monitorim. Gjithë stafi i Spitalit Rajonal të Fierit ka qenë i angazhuar për përballimin e situatës. Gjendja e 14 nxënësve që janë në monitorim tanimë është shumë e mirë, ata janë jashtë rrezikut për jetën dhe për situatën.

Janë marrë të gjitha analizat toksologjike nga instancat e tjera dhe se situata po shikohet nga afër, si në rastin e parë ashtu edhe në rastin e dytë. Janë cuar të gjitha ekzaminimet laboratorike pranë institucioneve përkatëse, të cilat do nxjerrin përfundimet e gjithë situatës”, tha drejtoresha e Spitalit Rajonal të Fierit Nevila Shuke.

Ndërkohë Policia e Shtetit deklaron se është shoqëruar në polici një nxënës i shkollë së mesme të përgjithshme “Janaq Kilica” në Fier, i cili dyshohet si shkaktar i ngjarjes së rëndë që ndodhi këtë paradite.

Polici thekson se dyshohet që ky nxënës ka hedhur sprajt në ambientet e shkollës, duke shkaktuar helmimin e së paku 30 nxënësve të gjimnazit.