Helmimi në Deçan, Musliu: Nuk ka vend për panik, AKI po vëzhgon çdo lëvizje!
Qytetarët e Komunës së Deçanit nuk kanë pse të shqetësohen sa i përket sigurisë kombëtare edhe pse ende nuk dihet arsyeja e helmimit në këtë qytet. Kështu bëri të ditur Kryetarja e Komisionit për Mbikëqyrjen e Agjencisë së Kosovës për Inteligjencë, Ganimete Musliu, ku raportoi për rreth një orë, Drejtori i AKI, Petrit Ajeti.
Pas mbledhjes, Musliu tha se Drejtori ka siguruar se AKI është në krye të detyrës me kapacitete të plota në Deçan dhe se po vëzhgon çdo lëvizje atje.
“Sa i përket pyetjeve tona drejtuar Drejtorit të AKI-së ishim të fokusuar në sigurinë kombëtare. Mund të them me bindje të plotë, për atë që tha Drejtori, se qytetarët në Deçan nuk duhet të kenë panik sa i përket anës së sigurisë kombëtare dhe përgjegjësive që ka AKI-ja. AKI është në krye të detyrës me kapacitete të plota në Deçan, po vëzhgon çdo lëvizje atje, dhe tani për tani janë këto gjërat që mund të themi pasi nuk janë të dhëna përfundimtare por paraprake,” tha Ganimete Musliu duke shtuar se tashmë ju mbetet institucioneve shëndetësore që të dalin më analiza të vërtetuara laboratorike në mënyrë që të dihet saktë se çfarë është duke ndodhur vërtet në Deçan ndërsa përfundoi:
“Tani ne nuk mund ta quajmë as helmim, sepse nuk kemi analiza të vërtetuara se çfarë në të vërtet është duke ndodhur atje, këto përfundime i nxjerrin institutet shëndetësore, që ta dimë a është helmim, epidemi apo ndonjë problem tjetër që mund të jetë.”
Ndryshe, Komuna e Deçanit po përballet me një gjendje të jashtëzakonshme ditët e fundit, ku mbi 1 mijë persona kanë kërkuar ndihmë në Qendrat e Mjekësisë Familjare me dyshimin se janë helmuar, dy prej të cilëve kanë vdekur.
