Heqja e masave, BE: Kosova duhet t’i përmbushë të gjitha kërkesat!

Për heqjen e masave të Bashkimit Evropian, Kosova duhet t’i përmbushë të gjitha kërkesat e Brukselit të parashtruara në komunikatën e 3 qershorit, ka konfirmuar sot zëdhënësi i BE-së, Peter Stano, thuase Serbia nuk ekziston fare ndonëse ishte shteti serb ai që krijoi këtë situatë dhe la invalidë të përjetshëm ushtarët hungarez të KFOR-it.

Në fillim të qershorit, tha Stano në Bruksel, Bashkimi Evropia qartazi ka saktësuar cilat janë detyrat e Kosovës.

“Prishtina zyrtare duhet t’i tërheqë të gjitha forcat policore nga ndërtesat komunale, t’i largojë kryetarët e komunave nga këto ndërtesa dhe mundësojë veprimtarinë e tyre nga objektet alternative si dhe shpallë zgjedhjet e jashtëzakonshme për katër komunat në veri, me pjesëmarrjen e serbëve lokal,” tha Stano duke konfirmuar se BE mirëpriti marrëveshjen a korrikut të arritur në Bratislavë në mes të Zv/Kryeministrit Besnik Bislimi dhe të dërguarit evropian për dialog Miroslav Lajçak, por, pranoi se kjo nuk mjafton për heqjen e masave të cilat janë vendosur në mes të muajit qershor.

“Të gjithë këta janë hapa shumë të rëndësishëm, hapa në drejtimin e duhur, por nevojiten hapa të mëtejshëm!”

Vetëm pas përmbushjes së kushteve drejt de-përshkallëzimit, Peter Stano konsideron se palët mund ti kthehen procesit të dialogut për normalizimin e marrëdhënieve me theks në zbatimin e marrëveshjes së arritur në shkurt dhe aneksin e dakorduar në mars në Ohër. Pa përparim në dialog, tha zëdhënësi i BE, Peter Stano, nuk ka përparim në Bashkimin Evropian.

Në fund, pas kësaj deklarate nuk është më e qartë nëse BE është e interesuar më shumë se Presidenti i Serbisë për status quon, pasi deri më sot ishte e qartë se vetëm Aleksandar Vuçiç mund të ishte personi i interesuar,për shkak të firmës që duhet të hedhë në marrëveshjen finale me Kosovën!