Heqja e ndalimit për mallrat serbe, Ambasadori i SHBA: I kënaqur me vendimin e Qeverisë!
Ambasadori i SHBA në Prishtinë, Jeff Hovenier, tha se Shtetet e Bashkuara e mirëpresin vendimin e Qeverisë së Kosovës për heqjen e ndalesës kufitare për mallrat që importohen nga Serbia.
“I kënaqur me vendimin e Qeverisë së Kosovës për heqjen e ndalimit për mallrat e gatshme të importuara nga Serbia. Ky është një hap i rëndësishëm në drejtimin e duhur për Kosovën në rrugën e tij drejt integrimit europian,” tha Ambasadori amerikan Hovenier në reagimin e tij përmes rrjett socia X duke përfunduar:
“Ne vlerësojmë partnerët tanë ndërkombëtarë për përpjekjet e tyre të vazhdueshme për të promovuar tregtinë e lirë në rajon.”
Ndryshe, dje Kryeministri i Kosovës, Albin Kurti, bëri të ditur se kufizimi për mallrat nga Serbia është hequr në pikëkalimin kufitar, Merdare, ndërkohë në pikëkalimet tjera pritet të heqet deri sa të pajisen me skaner të avancuar.
Vendimin për ndalimin e importit të mallërave nga Serbia, Qeveria e Kosovës e ka marrë në muajin korrik të vitit 2023, kur u rrëmbyen dhe më pas zyrtarisht u tha se janë arrestuar tre zyrtarë policorë të Kosovës, nga ana e policisë serbe.
