Heqja e sanksioneve ndaj Milorad Dodik, DASH: Ndikuan vendimet e fundit!

Departamenti amerikan i Shtetit,DASH, tha se “veprimet konstruktive” të ndërmarra gjatë javëve të fundit nga Asambleja Kombëtare e Republikës Srpska ndikuan në vendimin e SHBA-së për t’i hequr sanksionet kundër ish-liderit të serbëve të Bosnjes, Milorad Dodikut, dhe dhjetëra individëve dhe kompanive të lidhura me të.

Kryetari i Aleancës së Social Demokratëve të Pavarur, Milorad Dodik, ishte sanksionuar dy herë për shkak shkeljes së Marrëveshjes së Daytonit për Paqe.

Sanksionet ndaj tij, anëtarëve të familjes së tij, kompanive dhe bashkëpunëtorëve të tij të ngushtë, u hoqën dje.

“Veprimet e Asamblesë së entitetit serb të Bosnjes duhet të ndihmojnë në përmirësimin e stabilitetit në Bosnje dhe të mundësojnë një partneritet me Shtetet e Bashkuara të bazuar në interesa të përbashkëta, potencial ekonomik dhe prosperitet,” thekson DASH në një përgjigje për RFE duke përfunduar:

“Ne do të vazhdojmë të punojmë ngushtë me aktorë politikë në të gjithë Bosnjen për të vendosur prioritete të përbashkëta.”

Përveç Dodikut, të cilit iu hoq mandati si president i entitetit serb pas dënimit me burgim për mosrespektim të vendimeve të përfaqësuesit të lartë në Bosnje, nga lista e zezë amerikane u hoqën edhe anëtarja e Presidencës së Bosnjes, Zhelka Cvijanoviç, dhe mbi 40 individë dhe subjekte juridike.

Zyra amerikane për Kontrollin e Pasurive të Huaja, OFAC, nuk dha shpjegime pse i hoqi ata nga lista e sanksioneve në njoftimin e saj të mërkurën.

Çfarë vendimesh mori Asambleja e Republikës Srpska?

Më 18 tetor, Asambleja e Përgjithshme e entitetit serb e miratoi një ligj për shfuqizimin e ligjeve që tashmë ishin shpallur të pavlefshme nga Gjykata Kushtetuese e Bosnjes.

Ato përfshijnë Ligjin për Pronën e Paluajtshme të Përdorur për Funksionimin e Autoriteteve Publike, Ligji për Moszbatimin e Vendimeve të Gjykatës Kushtetuese të Bosnjës, Ligji Zgjedhor i Republikës Srpska, Ligji për Ndalimin e Aktiviteteve të Institucioneve Jashtëkushtetuese të Bosnjes, Ligji për Ndryshimet në Kodin Penal të Republikës Sërpska dhe Ligji për Këshillin e Lartë Gjyqësor dhe Prokurorial të Republikës Sërpska.

Dodiku ishte dënuar nga gjykata e Bosnjes për nënshkrimin e një ligji që bënte thirrje për moszbatimin e vendimeve të Gjykatës Kushtetuese të Bosnjes në entitetin e udhëhequr nga ai.

Përveç dënimit më një vjet burgim, të cilin e zëvendësoi më vonë me gjobë, Milorad Dodikut iu ndalua edhe ushtrimi i detyrës për gjashtë vjet.

Asambleja e Përgjithshme gjithashtu i beri të pavlefshme 12 konkluzione parlamentare të dhjetorit 2024, të cilat disa ambasada perëndimore i përshkruan në një deklaratë të përbashkët si “qëndrime kundër marrëveshjes së Daytonit”.

Asambleja gjithashtu e emëroi ish-këshilltaren e Dodikut, Ana Trishiç Babiç, si presidente në detyrë të Republikës Srpska./RFE/