Heqja e taksës, Vuçiç: Reciprociteti s’ka si aplikohet, Beogradi nuk e njeh Kosovën shtet!

Heqjen e takës për produktet serbe, Presidenti i Serbisë, Aleksandar Vuçiç e quan lajm të mirë ndërsa për parimin e reciprocitetit ai thotë se nuk mund të aplikohet sepse Beogradi nuk e njeh Kosovën si shtet

“Heqja e taksës është diçka që pritej, Kurti do që të përmirësoj pozitën e tij në politikën ndërkombëtare. Për ne është e rëndësishme për shkak të furnizimit me mallra të serbëve që jetojnë në Kosovë dhe përparimit të mëtejmë të ekonomisë serbe,” tha sot Vuçiç për televizionin publik të Serbisë, RTS, ndërsa për bashkëbiseduesin e ri në tryezë, Albin Kurti, tha se nuk është kjo punë e Beogradit se me kë ulet në bisedime por e atyre që e kanë votuar, pra popullit shqiptar.

Padinë e paralajmëruar për gjenocid nga Albin Kurti, Presidenti i Serbisë e quajti çmenduri ashtu si dhe armatimin e ushtrisë, por nga kjo, tha ai, shteti serb nuk ka frikë.

“Ju bëni punën tuaj, është mirë që mendoni për heqjen e taksës, është mirë që të bisedojmë edhe për të ardhmen,” ishte mesazhi i Vuçiçit nga televizioni publik duke e kritikuar edhe masën e re që paralajmëroi Albin Kurti për reciprocitet.

Kryeministri i ri Kosovës, tha Presidenti i Serbisë, duhet të gjejë diçka që do ti ofroj popullit të vet, mirëpo reciprociteti nuk mund të aplikohet sepse Beogradi nuk e njeh Kosovën si shtet

“Kjo do të ishte keq për ata. Ata analizojnë vetëm marrëveshjet që atyre u përshtaten. Këtu ka konflikte rreth marrëveshjes për diplomat e Universitetit të Prishtinës, i cili sipas neve është në Mitrovicë, e ata thonë se është i tyre, targat e makinave krijojnë probleme, energjetika, por me këto probleme po përballemi me vite të tëra dhe kemi arritur ti rezistojmë presioneve, por nuk duhet të luani nga mendja e kokës, se çdo kërkesë për çështje të tilla do të thotë formim Bashkësisë së komunave serbe,” tha Vuçiç duke i dhënë një mesazh të drejtëpërdrejtë Albin Kurtit nga televizioni shtetëror serb se nuk është e thjeshtë ashtu siç e mendon:

“Kurti duhet të shikoj dhe ta kuptoj se gjërat nuk janë aq të thjeshta, sikur kur jeni në opozitë dhe mund të flisni pa përgjegjësi,” tha Vuçiç i cili u mburrë se në tetë vitet e fundit nuk kishte luftë dhe pesë herë më pak kishte incidente, edhe pse, bazuar në historinë njerëzore, kjo është gjëja më e lehtë që mund të ndodhë në Ballkan: Vetëm Serbia të mos nxis incidente dhe luftëra!