Heqja e vizave për serbët, Kurti: E padrejtë dhe dekurajuese!
Kryeministri Albin Kurti e ka quajtur të padrejtë vendimin e Këshillit të Bashkimit Evropian për heqjen e regjimit të vizave për qytetarët serb të Kosovës me pasaportë të Serbisë.
“E konsiderojmë të padrejtë, të dëmshme dhe gjithashtu dekurajuese për integrimin e serbëve. Sidoqoftë shteti i Kosovës, Republika jonë demokratike dhe e pavarur e ka forcuar pasaportën e saj si asnjëherë më parë, ndërkaq ne nuk kemi mundësi të mëdha që të ndikojmë te vendimet e Brukselit,” u shpreh sot Albin Kurti me rastin e përurimit të Klinikës së Kardiokirurgjisë, ndërsa Presidenca e Kosovës e ka vlerësuar si sabotim të procesit të integrimit të komunitetit serb në Kosovë, e në veçanti në një periudhë kur një numër i madh i qytetarëve të etnisë serbe në Kosovë po pajiseshin me pasaporta të Republikës së Kosovës.
“Republika e Kosovës nuk merr asnjë përgjegjësi për shkeljet që bartësit e këtyre dokumenteve të jashtëligjshme mund të bëjnë në zonën Schengen. Për më tepër, vendimi i BE-së mbështet strukturat dhe prezencën ilegale të Serbisë në Kosovë dhe bie në kundërshtim me Kushtetutën dhe ligjet e Kosovës, si dhe me standardet e vetë BE-së në fushën e sundimit të ligjit,” shprehet Presidenca e Kosovës duke e sqaruar pse ky vendim është i pazbatueshëm ndërsa përfundon:
“Ky vendim i BE-së, ligjërisht është i pazbatueshëm në Kosovë, ndaj pasojat e tij nuk mund t’i marrë Kosova dhe institucionet e saj, sikurse as përgjegjësinë juridike dhe atë politike. E drejta e lirisë së lëvizjes duhet të ekzistojë gjithnjë, por jo në kundërshtim me Kushtetutën dhe ligjet e Republikës së Kosovës si dhe përpjekjeve e angazhimit tonë për sundim të ligjit në çdo cep të Kosovës.”
Ndryshe, dje Këshilli i Bashkimit Evropian miratoi një rregullore për përfshirjen në regjimin e udhëtimit pa viza të qytetarëve serbë të Kosovës që kanë pasaporta të lëshuara nga Serbia, duke theksuar se me këtë miratim përfundon procesi legjislativ dhe se me hyrjen në fuqi të rregullores, e cila do të ndodhë në ditën e 20-të pas botimit në fletoren zyrtare të Bashkimit Evropian, ajo do të bëhet e zbatueshme në të gjitha shtetet anëtare të BE.
