Heroi i Plazhit Bondi merr një çek prej 1.65 milionë dollarësh
Burri i cilësuar si hero për rrëmbimin e një arme nga një prej personave të armatosur gjatë të shtënave masive në Plazhin Bondi të Australisë mori sot një çek prej më shumë se 1.65 milionë dollarësh (2.5 milionë dollarë australianë), para këto të mbledhura nëpërmjet donacioneve nga dhjetëra mijëra njerëz në të gjithë botën.
Ahmed al Ahmed u fsheh pas makinave të parkuara përpara se të sulmonte njërin prej sulmuesve nga pas, duke i rrëmbyer armën dhe duke e rrëzuar përtokë. Ai pësoi plagë me armë zjarri, me sa duket pasi u qëllua nga një sulmues i dytë dhe aktualisht po shërohet në spital pas operacionit, raporton Agjencia e lajmeve Reuters.
Më shumë se 43.000 donacione nga e gjithë bota
Një çek i madh iu dorëzua në shtratin e spitalit nga Zachery Dereniowski, një influencer i mediave sociale dhe bashkëorganizator i fushatës GoFundMe.
Më shumë se 43.000 njerëz në të gjithë botën kanë marrë pjesë në mbledhjen e fondeve, përfshirë menaxherin miliarder të fondeve Bill Ackman, i cili dhuroi 99.999 dollarë australianë. Kryeministri australian dhe kryeministri i shtetit vizituan Ahmedin në spital për të lavdëruar trimërinë e tij.
Babait mysliman të dy fëmijëve iu dha një çek prej saktësisht 2.533.585 dollarë australianë.
“E bëra nga zemra”
Kur iu dha çeku, Ahmedi pyeti: “A e meritoj këtë?”, të cilës Dereniowski iu përgjigj: “Çdo qindarkë”. I pyetur se çfarë do t’u thoshte njerëzve që dhuruan, Ahmedi tha: “Le të qëndrojmë së bashku, të gjithë qeniet njerëzore. Dhe le të harrojmë të gjitha të këqijat… dhe të vazhdojmë të shpëtojmë jetë.”
“Kur shpëtova njerëz, e bëra nga zemra sepse ishte një ditë e bukur, të gjithë po argëtoheshin duke festuar, me fëmijët, gratë, burrat, adoleshentët e tyre, të gjithë, të gjithë ishin të lumtur dhe e meritojnë, e meritojnë të argëtohen”, shtoi Ahmedi, duke ngritur grushtin e tij të padëmtuar në ajër.
“Ky vend është vendi më i mirë në botë, por ne nuk do të rrimë duarkryq dhe të shikojmë – mjaft është mjaft. Zoti e bekoftë Australinë. Aussie, Aussie, Aussie.”
Pronari i dyqanit që tregton duhan nuk tha se çfarë planifikonte të bënte me paratë.
Kush është Ahmed al Ahmed?
Ahmed, 43 vjeç, u largua nga qyteti i tij i lindjes në krahinën veriperëndimore Idlib të Sirisë pothuajse 20 vjet më parë për të gjetur punë në Australi.
Ndryshe, në sulmin e së dielës në Plazhin Bondi të Australisë, 15 persona u vranë dhe dhjetëra të tjerë u plagosën pasi dy sulmues hapën zjarr ndaj njerëzve që festonin Hanukkah, festivalin hebraik të dritave, në plazhin e famshëm. Autoritetet thanë se sulmi u krye nga një baba 50-vjeçar, i cili u vra nga policia, dhe djali i tij 24-vjeçar, i cili është në gjendje kritike.
