Hetime për transplant të dyshimtë veshkash në Kroaci, i përfshirë një donator kosovar

Ministria e Shëndetësisë e Kroacisë ndaloi përkohësisht programin e transplantit të veshkave nga donatorë të gjallë në Qendrën Spitalore në Zagreb, për shkak të dyshimeve për trafikim të organeve atje, në vitin 2019.

Siç raporton televizioni publik kroat, HRT, bëhet fjalë për dhurues të veshkave nga Serbia dhe Kosova, të dy me status më të ulët social, ndërsa pranuesit e organeve janë burra nga Kroacia.

Ministria kroate e Shëndetësisë tha se rasti, fillimisht, është dorëzuar në Dhomën e Mjekëve të Kroacisë, për shkak të shkeljes së Kodit të Etikës Mjekësore, ndërsa më pas edhe në Prokurorinë e Shtetit.

Duke iu përgjigjur akuzave për trafikim organesh, Qendra Spitalore në Zagreb tha se të gjitha transplantet janë kryer me miratimin e Komisionit të Etikës të kësaj qendre.

“Të gjitha aktivitetet dhe procedurat e ndërmarra janë identike me procedurat që kryhen në të gjitha qendrat tjera të transplanteve në Republikën e Kroacisë, ku bëhen transplante të veshkave nga një donator i gjallë, që nuk ka lidhje me pranuesin,” thuhet në një deklaratë të Qendrës Spitalore në Zagreb.

Në Kroaci, transplanti i organeve nga donatorë të gjallë, që nuk kanë lidhje me pranuesin, është i mundur.

Kontrollet janë të rrepta dhe donatorët duhet t’u nënshtrohen testeve specifike psikologjike, miratimit nga ekspertë të qendrës së transplantit dhe komisionit të etikës së institucionit shëndetësor ku kryhet transplantimi, raporton HRT.

Reklamimi i disponueshmërisë ose nevojës për organe dënohet me burgim deri në tre vjet.

Avokatja Nevena Alinoviç, nga Departamenti i Shkencave Ligjore në Universitetin e Splitit, tha për HRT-në se transplantimi i organeve në rastet kur personi dhurues është viktimë e trafikimit me qenie njerëzore, ndëshkohet me dënimin më të rëndë – deri në dhjetë vjet burgim.

Sipas HRT-së, Kroacia, me më shumë se 100 transplantime veshkash në vit, është në mesin e vendeve udhëheqëse në botë./RFE/