Hetimet për Tahirin, audio-përgjimi, mbrojtja e Ramës dhe prova e prokurorisë…

Prej disa ditësh në qendër të vëmendjes së politikës dhe opinionit public është një audio-përgjim, ku sipas Partisë Demokratike, është Agron Xhafaj, vëllai i ministrit të Brendshëm, Fatmir Xhafaj.

Demokratët pretendojnë se audio tregon se vëllai i Xhafajt, i dënuar në Itali me 7 vjet e 2 muaj burg, është aktiv në trafikun e drogës, ndërsa i akuzuari ka mohuar që në përgjimin e kryer nga “Dëshmitari X” të jetë zëri i tij. Prokuroria ka nisur hetimet, thuhet se materiali është dërguar në Itali për ekspertizë, sikundër ka një variant se materiali i depozituar në organin e akuzës nga gazetari që ka kryer investigimin nuk është origjinali, por një kopje. Ndërkohë, Edi Rama, deklaroi publikisht se ka bërë ekspertizën e materialit, madje përcaktoi edhe përfundimin se ai nuk është autentik.

E gjithë situata zhvendosi vëmendjen nga hetimet për ish-ministrin e Brendshëm, Saimir Tahiri, për të cilin u tha se ishte edhe kusht për çeljen e negociatave me Bashkimin Europian. Tahiri ndodhet në arrest shtëpie, palët i janë drejtuar Apelit për masë tjetër sigurie, ku prokuroria kërkon arrestin me burg dhe ish-ministri i Brendshëm kërkon lirinë.

Hetimet për Tahirin

Pavarësisht se vëmendja më e madhe e opozitës dhe mediave është e përqëndruar në rastin e vëllait të ministrit Fatmir Xhafaj, prokuroria duket se ka vijuar hetimet për Tahirin. Burime nga Prokuroria e Krimeve të Rënda bënë të ditur për Pafrike.al se gjatë ditëve të fundit janë pyetur dy nga ish-drejtuesit e policisë kufitare në Durrës dhe Vlorë. Gëzim Zhupa dhe Boge Budini mësohet se janë pyetur lidhur me dyshimet e Prokurorisë mbi lëvizjet e ish-ministrit të Brendshëm jashtë vendit. Sikundër është raportuar këto janë edhe provat e reja që zotëron organi i akuzës, mbi të cilën bazon kërkesën për arrestimin e ish-ministrit.  Të dy ish-zyrtarët e policisë kufitare konsideroheshin si ndër njerëzit e besuar të ish-ministrit të Brendshëm në rradhët e policisë së shtetit gjatë kohës që ai drejtonte Ministrinë e Brendshme.

Audio-përgjimi

Audio përgjimi për vëllain e ministrit Xhafaj u publikua në një kohë kur vëmendja ishte tek ish-ministri i Brendshëm Tahiri. Ndoshta rastësi, por ajo që mund të thuhet sot është që çështja Tahiri u la në harresë nga opozita, e cila për muaj me rradhë e kishte në qendër të vëmendjes.

Prokuroria ka nisur hetimet dhe pritet një përgjigje për ekspertizën e audios, ndërkohë që dëshmi në organin e akuzës kanë dhënë “Dëshmitari X”, gazetari që ka kryer investigimin, dy deputetët e PD-së, Ervin Salianji dhe Enkelejd Alibeaj, eksperti ligjor pranë PD-së, Gazmend Bardhi, ndërsa mungon dëshmia e Agron Xhafajt, të akuzuarit kryesor në këtë audio-përgjim.

Xhafaj thuhet se është në Itali, madje raportohet se drejt vendit fqinj ka udhëtuar edhe një prej prokurorëve të Krimeve të Rënda, ndoshta për ta marrë në pyetje. Agron Xhafaj iku drejt Italisë, sipas raportimeve, pak ditë pas publikimit të audio-përgjimit dhe një vendimi të Gjykatës së Kasacionit të Italisë, që e dënonte me 7 vjet e 2 muaj burg. PD denoncoi faktin se Xhafaj nuk kishte shlyer dënimin, ndërsa akuzoi ministrin e Brendshëm, Fatmir Xhafaj, se i kishte siguruar mbrojtje vëllait të tij.

Qëndrimi i Ramës

Kryeministri Edi Rama ka marrë në mbrojtje ministrin e Brendshëm, Fatmir Xhafaj, dhe për rrjedhojë edhe vëllain e tij, Agron Xhafaj. Rama përdori të njëjtën skemë si në rastin e ish-ministrit të Brendshëm, Sajmir Tahiri. Disa orë pas publikimit të audio-përgjimit, Rama deklaroi pubikisht se materiali nuk ishte autentik. Ai tha se kishte marrë përgjigje nga një laborator ndërkombëtar i çertifikuar, por nuk dha hollësi të tjera. Rama deklaroi se ishte në pritje të Prokurorisë.

Deklarata e Ramës u konsiderua një ndërhyrje në hetime, apo një përcaktim që i bëhej hetimit të nisur nga Prokruroria lidhur me audio-përgjimin. Thuhet se organi i akuzës ka dërguar materialin në Itali për të marrë përgjigjen e ekspertizës, por edhe Prokuroria nuk ka dhënë detaje të mëtejshme zyrtare. Nuk dihet se në këtë këtë rast nuk i është kërkuar ndihmë FBI, aq më tepër kur ka një deklarim zyrtar nga Ambasada amerikane në Tiranë se po ndjekin rastin me kujdes.

Ndoshta për amerikanët kjo është “prova e zjarrit” për Prokurorinë, e cila sot ka dy drejtues të rinj, Arta Markun dhe Donika Prela, të mbështetur publikisht në funksionet e tyre. Tashmë pritet ekspertiza, e cila do të përcaktojë deri diku edhe besueshmërinë që do të ketë organi i akuzës në Shqipëri, veçanërisht kur pritshmëritë janë të larta në goditjen e personazheve që kanë lidhje me nivelet e larta, apo goditjen ligjore të zyrtarëve.

Barra e provës në rastin e audio-përgjimit i ka mbetur institucioneve të shtetit, konkretisht qeverisë dhe prokurorisë, dhe ajo mund të përcaktojë edhe fatin politik të  mazhorancës qeverisëse, por edhe të opozitës, që mori përsipër denoncimin.

Kryeministri Rama ka lënë të hapur opsionin për mbajtjen e një qëndrimi politik në rast se audio përgjjimi rezulton i vërtetë, që mund të përkthehet jo vetëm me shkarkimin e ministrit të Brendshëm, por edhe çuarjen e vendit drejt zgjedhjeve të parakohshme. Loja tashmë e nisur i ngjan një finaleje, ku vetëm njëra palë mund të fitojë trofeun…