“Hetimet për UÇK-në”/ Me Bashën, Kryetari Mitrovicës: Shpifje të ulëta, do të mbrojmë nipin tonë!
Pas takimit me kryetarin e komunës, Mitrovicë Jug, Agim Bahtiri, kryetari i PD, Lulzim Basha tha se biseduan për sfidat e mëdha dhe domosdoshmërinë për një përgjigje të bashkuar për interesat e Shqipërisë e të Kosovës ndërsa Bahtiri i cilësoi shpifje të ulëta akuzat që i bëhen Bashës rreth hetimeve të UÇK-së, dhe e bëri të qartë se do ta mbrojnë deri në fund nipin e Drenicës.
“Si qytetar nderi i Mitrovicës, dua së pari t’i shpreh mirënjohje dhe falënderimet më të sinqerta për vizitën e tij, por edhe për mikpritjen e ngrohtë që më rezervoi gjatë vizitës time zyrtare në Kosovë, para disa muajsh. Kemi folur për sfidat e mëdha me të cilat po përballet sot Kosova, dhe domosdoshmërinë për një përgjigje të bashkuar për interesat e Shqipërisë e të Kosovës në interesat kombëtare dhe solidarizimin me Kosovën, me qytetarët, me institucionet e Kosovës për përballjen në këto sfida.”
Kryetari i komunës, Mitrovicë Jug, Agim Bahtiri, nga ana e tij i bëri apel të gjithë krerëve të partive politike si në Shqipëri ashtu edhe në Kosovë që të bashkohen sot si një trup për arsye se kemi një tragjedi në Kosovë me atë që po ju ndodhë çlirimtarëve.
“Kosova është në situate tejet të keqe dhe brenguese për arsye se çlirimtarët tonë, Ushtria Çlirimtare e Kosovës sot po trajtohet në Hagë padrejtësisht. Prandaj shpifjet më të ulëta që i bën dikush me qëllime të caktuara, nuk i takojnë Bashës dhe për atë jemi këtu që të mbrojmë deri në fund në emër të gjithë qytetarëve të Mitrovicës por edhe shumë qytetarë të tjerë të Kosovës sepse e kemi nip dhe si i tillë ka dhënë një kontribut të veçantë për Kosovën dhe unë e falenderoj përzemërsisht.”
Kryetari i Komunës, Agim Bahtiri, ishte i shoqëruar nga kontribuesi më i madh i të vërtetës për Mitrovicën, kryetari i KLMDNJ, Halit Barani të cilin dhe kryetari i PD, Lulzim Basha e falënderoi:
“Faleminderit zoti kryetar. Gjatë vizitës, kemi pasur nderin të kemi një aktivist 31-vjeçar të të drejtave të njeriut, me personalitet të të drejtave të njeriut për Mistrovicën, Kosovën dhe gjithë botën shqiptare, zotin Halit Barani, të cilin dua po kështu ta përshëndes dhe ta falënderoj që i është bashkangjitur delegacionit të kryetarit Bahtiri,” tha Lulzim Basha duke përfunduar:
“Zoti Barani, një person me kontribute të jashtëzakonshme në dokumentimin e dhunimit sistematik të të drejtave të njeriut në Kosovë dhe në veçanti, në dokumentimin e spastrimit etnik dhe gjenocidit në zonën e Mitrovicës, një ndihmë e jashtëzakonshme që ka dhënë për zbardhjen e këtyre krimeve të përbindshme dhe vënien e disa prej përgjegjësve para drejtësisë!”
