Hetimi krimeve zgjedhore, Celibashi: KQZ s’ka detyrim t’ia kërkojë PD-së kontratën. Pas shpalljes rezultateve…

Kreu i KQZ, Ilirian Celibashi, duke folur për zhvillimet e fushatës elektorale për zgjedhjet e 11 majit tha se në ditët në vijim mund të ketë informacione më konkrete dhe të detajuara lidhur me hetimin mbi krimet zgjedhore ndërsa sqaroi edhe kaosin që krijoi Edi Rama lidhur me kontratën 6 milionë dollarëshe të Partisë Demokratike me Continental Strategies, për të cilën Kodi Zgjedhor është shumë i qartë dhe nuk ka çfarë të hetohet para publikimit të rezultatit të zgjedhjeve.

Megjithatë, ai vuri në dukje se ka një vëmendje të shtuar në lidhje me problematikën e krimeve zgjedhore, gjë që ai e cilësoi si pozitive.

“Në ditët në vijim mund të ketë informacione më konkrete dhe të detajuara por ka vëmendje të shtuar në lidhje me këtë problematikë,” tha Celibashi ndërsa sqaroi dhe situatën lidhur me kontratën e Partisë Demokratike të publikuar së fundmi për lobim në Shtetet e Bashkuara të Amerikës.

KQZ nuk e disponon këtë kontratë dhe nuk ka asnjë detyrim që t’ia kërkojë PD-së këtë dokument në këtë moment, tha kreu i KQZ duke saktësuar se PD ka një afat prej 60 ditësh pas shpalljes së rezultatit të zgjedhjeve për dorëzimin e saj ndërsa përfundoi:

“Partitë politike kanë detyrim që të depozitojnë në KQZ të ardhurat dhe shpenzimet jo më vonë se data 31 mars e vitit pasardhës. Kurse koalicionet jo më vonë se 60 ditë nga shpallja e rezultatit zgjedhor. Kjo përfshin edhe Aleancën për Shqipërinë Madhështore, përfundon jo më vonë se 60 ditë nga shpallja e rezultatit.

Nuk ka detyrim në këto momente që t’i dorëzojë të ardhurat dhe shpenzimet si subjekt zgjedhor dhe që do të thotë se nuk e kemi këtë kontratë dhe nuk ka as detyrim, tej spekullimeve për tia kërkuar në këtë moment, sikurse thuhet se ‘pse nuk është kërkuar kjo kontratë nga ne’. Por në momentin që do e kemi, do japim vlerësimin tonë për këtë kontratë.”

Lidhur me ecurinë e procesit të votimit nga diaspora dhe problematikat e hasura gjatë shpërndarjes së fletëve të votimit për emigrantët, Celibashi tha se procesi po ecën relativisht mirë dhe se çdo problematikë po adresohet tek aktorët përkatës.

Deri më tani, tha ai, kanë mbërritur mbi 70 mijë fleta votimi nga 245.935 të tilla që janë dërguar.