Hetuesit e OBSH, e pamundur që koronavirusi doli nga loboratori në Kinë
Është krejtësisht e pamundur që koronavirusi doli pas incidentit në laboratorin në Kinë, theksuan sot hetuesit të cilët në Kinë po mundohen të zbardhin prejardhjen e koronavirusit, raporton Sky News.
Hetuesit besojnë se shkaktari më i mundshëm i shpërthimit të parë të infeksionit është virusi i cili “u hodh” nga kafsha tek njeriu.
Kjo do të thotë që hetimet e mëtejme nuk do të fokusohen tek incidenti në laborator, si shkaktari i mundshëm i shpërthimit të infeksionit me koronavirus.
Ekipi ndërkombëtar i shkencëtarëve të Organizatës Botërore të Shëndetësisë, OBSH, i cili po punon me ekspertët kinez ka kohë që po mundohet të zbuloj se si filloi pandemia e koronavirusit.
Kafsha prej së cilës kaloi virusi tek njeriu?!
Ekipi i shkencëtarëve ka vizituar pikat kyçe në Wuhan, qytetin kinez ku janë shfaqur rastet e para të infeksionit, biseduan me pacientët, punëtorët shëndetësor dhe shkencëtarët kinezë.
Dëshmitë deri më tani sugjerojnë se koronavirusi “u hodh” nga kafshët tek njerëzit, e ekipi i hetuesve me në krye ekspertin e OBSH për sigurinë e ushqimit dhe sëmundjet e kafshëve, Peter Ben Embarek, sot në konferencë për media tha se ende nuk dihet se për cilën kafshë është fjala dhe ku ka ndodhur saktësisht.
Përreth Wuhanit
Shkencëtarët gjithashtu kanë zbuluar se koronavirusi ndoshta ka qarkulluar në rajonet përreth Wuhanit para se të shfaqej për herë të parë infeksioni, raporton Sky News.
Të dhënat, që ende nuk janë publikuar, sugjerojnë se virusi SARS-CoV-2 është gjetur disa javë para se të shfaqen rastet e para në Wuhan, tha shefi i panelit të ekspertëve kinez pranë Komitetit Kombëtar Shëndetësor për COVID-19.
