Hidhet në erë mjeti i prokurorit Arjan Muça, Policia jep detajet

Pas hedhjes në erë të mjetit të prokurorit, Arjan Muça, te Komuna e Parisit, Policia e Tiranës njofton se nga shpërthimi ka vetëm dëme materiale ndërsa janë ngritur pika kontrolli në zonë dhe hyrje-dalje të kryeqytetit.

Ndërkohë Grupi hetimor ndodhet në vendngjarje dhe po punon për zbardhjen e plotë të  rrethanave të ngjarjes.

Për seriozitetin e situatës flet dhe prezenca e Drejtorit të Policisë Tiranës, Rebani Jaupi, në vendin e ngjarjes:

“Kemi një dëmtim me lëndë plasëse eksploziv të një mjeti a class të vitit 2002 I cili I përket një prokurori që është I komanduar pranë KLP Arjan Muça, mjeti ka dëmtime në pjesën e përparme ky automjet përdoret nga ky prokuror dhe aktualisht prej një periudhe 2-vjeçare çdo natë parkohet pranë kësaj qendre. Janë marr masat nga strukturat e drejtorisë vendore të policisë për dokumentimin e kësaj vepre penale. Nuk ka dëmtime në njerëz dhe as dëmtime të mjeteve të tjera. Nuk ka shpërthim të automjetit është një shpërthim që ka ndodhur në parakolpin e këtij mjeti. Grupi hetimor po merret me pamjet,” tha Rebani Jaupi në vendin e ngjarjes.

Informacioni paraprak:

Me datë 11.03.2021, rreth orës 19:30, tek Komuna e Parisit, në rrethana ende të paqarta ka shpërthyer dyshohet si pasojë e lëndës plasëse mjeti i parkuar në pronësi të shtetasit A. M., ku ka vetëm dëme materiale.

Grupi hetimor ndodhet ne vendngjarje dhe po punon për zbardhjen e plotë të  rrethanave të ngjarjes.

Shërbimet e Policisë po kontrollojnë zonën si dhe janë ngritur pika kontrolli me qëllim kapjen e autorit.