”Hidrocentralet”, Gjykata liron nga akuza katër ish-ministra të Qeverisë së Kosovës

Katër ish-ministra të Qeverisë së Kosovës janë liruar nga akuza për “keqpërdorim të detyrës zyrtare“ në rastin e njohur si “Afera e Hidrocentraleve”.

Gjykata Themelore në Prishtinë, raporton RFE, ka liruar nga akuza ish-ministrat: Mimoza Kusari Lila, Nenad Rashiç, Besim Beqaj dhe Dardan Gashi.

Shpallja e aktgjykimit për këtë rast është bërë sot nga kryetari i trupit gjykues, Valon Kurtaj.

“Ata janë liruar nga akuza, pasi që gjykata nuk ka gjetur prova se të njëjtit kanë kryer veprat penale për të cilat janë akuzuar nga Prokuroria Speciale e Republikës së Kosovë,” thuhet në njoftimin e Gjykatës Themelore.

Në prill të vitit 2020, Prokuroria kishte ngritur aktakuzë kundër 19 personave, përfshirë edhe ish-ministrat e Qeverisë, që në atë kohë udhëhiqej nga ish-kryeministri Hashim Thaçi.

Ata ishin anëtarë të Komitetit Qeveritar për Privatizim, dhe akuza që rëndonte mbi ta ishte se në cilësi të personave zyrtar kanë tejkaluar kompetencat e tyre në këtë komision.

Sipas aktakuzës ata njëzëri kishin votuar që hidrocentralet të cilat prodhojnë energji elektrike si: hidrocentrali i Lumbardhit, hidrocentrali në Burim, Hidrocentrali i Radavcit dhe hidrocentrali “Dikance”, të transferohen tek Kompania Kosovare të Distribucionit dhe Furnizimit me Energji Elektrike (KKDFE) dhe më pas të privatizohen nga kompania “Limak-Calik”.

“Me nënshkrimin e këtyre marrëveshjeve është përmbyll procesi i privatizimit të KKDFE-së, përkundër faktit se të njëjtat nuk është dashur të tranferohen dhe privatizohen, për arsye se një veprim të tillë e ndalon baza ligjore”, thuhej në njoftimin për aktakuzë të vitit 2020.

Sipas organit të akuzës, raporton RFE, dëmi tjetër i shkaktuar nga personat e akuzuar është është vlera e investuar (shtuar) në hidrocentrale prej 12,628,166.41 euro, që nuk përfshinë vlerën e aseteve para koncesionit, sepse, sipas prokurorisë, KEK-u nuk ka bërë regjistrimin dhe nuk ka prezentuar vlerën e aseteve para privatizmit.

“Ky dëm dëm edhe më tutje vazhdon të shkaktohet në mënyrë të përhershme”, kishte vlerësuar Prokuroria Speciale.