Himarë, ekzekutohet biznesmeni Niko Goro. Autori: Nuk shkova për ta vrarë!
Mëngjesin e sotëm Himara u tronditë nga ekzekutimi me armë zjarri biznesmenit 51-vjeçar Niko Goro ndërsa policia raporton për arrestimin e autorit të dyshuar Kliti Leka, 53 vjeç.
“Policia në kohë rekord kap gjatë ndjekjes autorin e dyshuar të vrasjes së 51 vjeçarit N.G. Si rezultat i reagimit në kohë dhe ndjekjes së pandërprerë të autorit, u bë e mundur që në vendin e quajtur “Livadhet”, të kapej dhe prangosej autori i dyshuar i vrasjes, shtetasi Kliti Leka , 53 vjeç, banues në Tiranë,” thekson Policia duek saktësuar se ka sekuestruar armën e dyshuar të krimit, armë zjarri kallashnikov dhe automjetin me të cilin u largua autori.
Pasi kishte vrarë 51-vjeçarin dhe më pas kishte plagosur motrën e këtij të fundit, BW raporton se Kliti Leka ishte larguar në drejtim të Livadhit, ndërsa në automjet iu gjetën dhe dy armë, një automatik dhe një pistoletë. Sipas grupit hetimor, ka dyshime se fakti që armët kishin ende plumba, autori kishte menduar që t’i jepte fund jetës duke u vetëvrarë. Por pas ndërhyrjes së policisë ai u neutralizua. Pas arrestimit mësohet se autori i krimit nuk ka shfaqur pendesë, ndërsa pohoi se nuk kishte shkuar për ta vrarë biznesmenin.
Autori ndoqi në këmbë biznesmenin, plumbi në kokë ishte fatal
Detajet e krimit të rëndë, i raporton BW. Autori i krimit, 53-vjeçari Kliti Leka, ka parkuar makinën e tij në cep të rrugës dhe ka ecur në këmbë në drejtim të marketit, ku ishte futur biznesmeni Goro.
Pasi ky i fundit ka dalë nga marketi i motrës së saj, Leka e ka qëlluar disa herë me pistoletë, duke u lënë të vdekur. Në atë moment ka dalë dhe motra jashtë dhe ka parë vëllanë të shtrirë, duke ngritur kujën. Sipas gazetarit, goditja fatale ka qenë plumbi në kokë, ndërsa dy të tjerët kanë qenë pranë zemrës dhe në kraharor.
Menjëherë jashtë ka dalë edhe pastruesja, e cila i është drejtuar autorit e alarmuar, duke i thënë “Çfarë bëre, i vrave”? Ndërkohë, referuar dëshmive nga vendngjarja, 53-vjeçari Leka i është kthyer, duke i thënë “Mbylle gojën se do vritesh edhe ti”!
Pastaj, ai ka lënë mjetin në rrugë dhe ka ikur në këmbë. Momenti i largimit të tij është parë nga kamerat e sigurisë, gjë që ka ndihmuar policinë për arrestimin e autorit.
Më pas, mësohet se autori ka thënë se nuk kishte qëllim ta vriste, por vetëm ta trembte për t’i kthyer borxhin.
Biznesmeni ka pasur një biznes në qendër të Himarës dhe dy të tjerë, njëri në proces ndërtimi. Shkaku i kësaj ngjarjeje, deri më tani, thotë gazetari, është pikërisht objekti në afërsi të bregdetit dhe shuma që, sipas Lekës, nuk i është kthyer, pasi toka ku po ndërtohet i përket të afërmit të tij.
