Hina: Shqiptarët po i shesin avionët e tyre MiG
Në shpatin e zhveshur në veri të Shqipërisë, e vendosur në zemër të malit, prapa dyerve masive prej çeliku, është një bazë e fshehur ajrore nga e kaluara komuniste shqiptare.
Në këto 600 metra tunele malore, dikur ziente jeta ushtarake, por sot baza ajrore Gjadër është depo e dhjetëra avionëve të vjetër MiG të cilët në errësirë i mbledhin pluhurat, shkruan Agjencia kroate e lajmeve Hina në një reportazh kushtuar avionëve shqiptar MiG dhe mundësisë së shitjes së tyre.
Vetëm nostalgji
Tre dekada pas rënies së komunizmit, autoritetet shqiptare po përpiqen të shesin avionët e lashtë të prodhimit sovjetik dhe kinez.
“Ne po i harmonizojmë armët tona me standardet e NATO-s,” thotë shefi i Shtabit Bardhyl Kollçaku ndërsa për MiG shton:
“Sa i përket avionëve MiG, përveç nostalgjisë, arsye kjo që disa prej tyre do ti mbajmë në muzetë tona, pjesën tjetër ne e ofrojmë për shitje,” tha ai.
Avionët shqiptarë MiG 17, 19 dhe 21 janë çregjistruar shumë kohë më parë.
Muzetë, shkollat dhe koleksionistët kanë shprehur synimin e tyre për t’i dhënë këtyre avionëve një shtëpi të re.
Kur Shqipëria njoftoi për herë të parë mundësinë e shitjes së avionëve, qeveria shqiptare mori kërkesa nga Muzeu i Aviacionit Francez dhe Shkolla e Fluturimeve në Gjermani.
Lista e pritjes për blerje
Shitjet deri më sot nuk janë realizuar për shkak të arsyeve burokratike dhe dokumenteve.
Në listën e pritjes ka dhe individë, entuziastë dhe dashamirë të avionëve, duke përfshirë këtu edhe biznesmenin francez, Julien Roche, i cili do ta vendoste një avionë MiG në kopshtin e tij.
“Nuk është e lehtë për të gjet një avion të tillë sepse shumica e tyre janë shkatërruar dhe nuk ruhen si në Shqipëri,” tha ai ndërsa është në radhë për blerjen e njërit prej modeleve më të vjetra, MiG-15 i prodhimit kinez. Çmimi fillestar mezi arrin 10.000 euro. Ashtu si edhe me 7.000 bunkerët e betonit të shpërndarë në gjithë vendin, baza ajrore Gjadër me rrjetin e saj të tuneleve ishte pjesë e planit të diktatorit Enver Hoxha që ta mbajë vendin me frikë nga armiku i jashtëm.
