Homazhe shqiptare dhe nga e gjithë bota: Papa i Popullit!

Pasi mëngjesin e sotëm Papa Françesku u kthye në shtëpinë e Atit, la të pikëlluar botën shqiptare dhe jo vetëm.

Një burrë të madh të njerëzimit, një mik të shquar të kombit shqiptar, e cilësot sot Papa Françeskun pasi u nda nga jeta, Kryetari i Partisë Demokratike Sali Berisha.
“Krishterimi, mbarë njerëzimi, shqiptarët kanë humbur sot një kolos të mendimit, të besimit tek Zoti, por edhe të dashurisë dhe respektit për njeriun. I përjetshëm kujtimi i shenjtërisë së tij, Papa Françeskut!” tha Sali Berisha në momentin që iu dha lajmi i kobshëm ndërsa ishte në një tubim elekeoral.

Presidentja e Kosovës, Vjosa Osmani, tha se Kosova dhe populli i saj u bashkohen miliona njerëzve në mbarë botën për të shprehur pikëllimin për vdekjen e Papa Françeskut.

“Trashëgimia e tij do jetojë në jetët e panumërta që preku ai. Ne qëndrojmë së bashku me të gjithë ata që e çojnë përpara mesazhin e tij për shpresë, paqe dhe dinjitet njerëzor,” u shpreh Vjosa Osmani në reagimin e saj pas lajmit mbi vdekjen e Papa Françeskut.

“Në këtë të hënë të Pashkëve – një ditë shprese dhe ripërtëritjeje për të krishterët në mbarë botën – ne vajtojmë vdekjen e Shenjtërisë së Tij Papa Françeskut. Trashëgimia e tij e përulësisë, drejtësisë dhe dhembshurisë do të vazhdojë,” thekson Kryeministri Albin Kurti duke shpreh ngushëllimet më të thellanë emër të popullit të Kosovës ndërsa përfundon: “U prehtë në paqe!”

“Papa Françesku predikoi paqe, dashuri, përulësi dhe solidaritet. Mesazhet e tij për dialog ndërfetar, bashkëjetesë dhe vlera universale do të mbeten një trashëgimi frymëzuese për miliona njerëz në mbarë botën, përfshirë edhe në shoqëritë tona,” shprehet Kryetari i BDI, Ali Ahmeti, duke i shpreh ngushëllime besimtarëve katolikë dhe gjithë atyre që gjetën frymëzim në udhëheqjen e tij shpirtërore.

Presidenti francez Emmanuel Macron është ndër liderët e parë botërorë që i bëri homazhe Papa Françeskut, duke e quajtur atë një “njeri të përulur, në anën e më të cenuarve dhe më të brishtëve”.

Zv/Presidenti i SHBA, JD Vance, i cili e takoi ditën e djeshme Papën tha se ishte i lumtur që e kishte parë një ditë më parë.

“Sapo mësova për vdekjen e Papa Françeskut. Mendimet e mia shkojnë për miliona të krishterë në mbarë botën që e donin atë. Isha i lumtur që e pashë dje, edhe pse ishte shumë i sëmurë. Por do ta kujtoj gjithmonë për predikimet e tij në ditët e para të Covid. Ai ishte vërtet i mrekullueshëm” , tha Vance. “

Kryeministrja e Italisë, Giorgia Meloni tha se e gjithë bota do ta kujtojë Atin e Shenjtë, si “Papa i Popullit:’. “Do të më mungojë edhe mua, kishim një marrëdhënie të jashtëzakonshme personale, mund të flisje për çdo gjë, ishte shumë i veçantë”.

Kancelari i ardhshëm gjerman, Friedrich Merz, tha se Françesku do të kujtohet për “angazhimin e tij të palodhur për më të dobëtit në shoqëri”.

Presidentja e Komisionit Evropian Ursula von der Leyen tha se “ai frymëzoi miliona njerëz, shumë përtej Kishës Katolike, me përulësinë dhe dashurinë e tij”

Presidentja e Parlamentit Evropian Roberta Metsola tha se “buzëqeshja e tij pushtoi zemrat e miliona njerëzve në mbarë globin”

Kryeministri i Indisë Narendra Modi tha se është “thellësisht i trishtuar” nga vdekja e Papa Françeskut.

Kryeministri polak Donald Tusk e kujton Papa Françeskun si një “njeri të mirë, të ngrohtë dhe të ndjeshëm”.

Presidenti i Egjiptit Abdul Fattah al-Sisi tha se Papa Françesku “ishte një zë paqeje, dashurie dhe dhembshurie”.

Kryeministri holandez Dick Schoof tha se Papa Françesku ishte në çdo mënyrë një njeri i popullit.

Presidenti izraelit Isaac Herzog përshëndet “dhembshurinë e tij të pakufishme”, ndërsa Presidentja zvicerane Karin Keller-Sutter tha se Papa Françesku ishte një “udhëheqës i madh shpirtëror, një avokat i palodhur për paqen”.

Patriarkana e Moskës tha se Papa Françesku ka luajtur rol të rëndësishëm në zhvillimin aktiv të kontakteve mes Kishës Ortodokse Ruse dhe Kishës Katolike Romake, raportoi agjencia e lajmeve TASS.

Ndërsa nga Ministria e Jashtme e Iraniti gjithashtu shprehën pikëllimin për lajmin e vdekjes së tij, dhe shprehën “ngushëllime për të gjithë të krishterët në mbarë botën”.

Ndryshe, Papa Françesku ndërroi jetë mëngjesin e sotëm në moshën 88-vjeçare, në rezidencën e tij në Casa Santa Marta të Vatikanit.

“Të dashur vëllezër e motra, ju njoftojmë me pikëllim të thellë se Papa Françesku ka vdekur. Në orën 7:34 mëngjesin e sotëm, peshkopi i Romës, Françesku, u kthye në shtëpinë e Atit,” tha kardinali Kevin Farrell përmes një njoftimi në kanalin televiziv të Vatikanit.