Homazhe në Çikatovë, Presidentja Osmani: Masakra më mizore e luftës së fundit në Kosovë
Pas homazheve në Çikatovë me kryetarin e Parlamentit, Glauk Konjufcanë, Presidentja e Kosovës, Vjosa Osmani tha se kjo është një nga masakrat më mizore më të tmerrshme të luftës së fundit në Kosovë e cila e dëshmon qartë qëllimin shfarosës që Serbia e kishte ndaj popullit shqiptar në Kosovë
“Jemi këtu me kryetarin e Kuvendit, z.Konjufca për të nderuar të gjithë viktimat e masakrës së 17 prillit këtu në Çikatovë të vjetër por edhe të gjithë dëshmorët e të rënët e këtij fshati, të gjithë martirët ranë në mënyrë që ne sot ta gëzojmë lirinë. Është një nga masakrat më mizore më të tmerrshme të luftës së fundit në Kosovë e cila e dëshmon qartë qëllimin shfarosës që Serbia e kishte ndaj popullit shqiptar në Kosovë,” tha Presidentja e Kosovës me rastin e 22 vjetorit të kësaj masakre duke shtuar se të gjithë ata që kanë dyshime rreth këtij qëllimi, mjafton që të vij këtu në Çikatovë e pastaj të shkoj në Poklek e ta shoh se si serbët nuk kursyen as më të vjetrit e nuk kursyen as fëmijët më të vegjël e as shkrimtarët e fëmijëve në Poklek, për të treguar që qëllimi i tyre nuk ishte vetëm spastrimi etnik por ishte që ta zhdukte popullin shqiptar nga faqja e dheut ndërsa përfundoi:
“Ne qe jemi të gjallë fal sakrficës së tyre që dhanë jetën e lirinë e Kosovës, e kemi borxhin më të lartë njerëzor që të sigurojmë drejtësi për secilin prej tyre sepse vetëm ditë kur do të ketë drejtësi për të gjithë të rënët për lirinë tonë, atëherë edhe paqja po ashtu stabiliteti afatgjatë në rajonin tonë do të jetë i mundur. Lavdi të gjithë të rënëve dhe i përjetshëm do të jetë kujtimi për secilin prej tyre.”
Pas homazheve në Çikatovë, Vjosa Osmani e Glauk Konjufca vizituan Kompleksin Memorial në Poklek, aty ku 22 vjet më parë u vranë, e u djegën mbi 50 civilë të pafajshëm.
“Lirie Muqolli kishte gjashtë muaj, kur u vra mizorisht dhe kur pastaj me së bashku 50 martirë të tjerë, jo vetëm që u vranë por u dogjën. Dhe jo që vetëm u dogjën, por u dogjën dy herë. Në mënyrë që as të mund të identifikohen. Për mizori të tilla të shkrumbimit të fëmijëve të pafajshëm, ne patëm dëgjuar dhe lexuar për luftën e dytë Botërore, për Holokaustin dhe kjo masakër nuk mund të quhet me emër tjetër përveç se gjenocid. Sepse është dëshmia më e qartë e qëllimit që kishte regjimi gjenocidal serb. Sepse ky qëllim qartësohet kur ata treguar që e kanë për qëllim të shfarosin edhe më të vegjlit edhe më të pafajshmit,”tha Presidentja e Kosovës duke sqaruar se kur liria do të ketë kuptim:
“Duhet ta themi me zë të lartë, që liria nuk është e plotë. Nuk është e plotë për shkak të drejtësisë së munguar. Dhe liria do të ketë kuptim vetëm atë ditë kur do të ketë drejtësi për lirinë e vogël. Vetëm atë ditë kur do të ketë drejtësi për gjitha viktimat të pushtetit gjenocidal serb. Kur Serbia të kërkojë falje, kur të vendos lule dhe kur të pranojë fajin për të gjitha masakrat në Kosovë ndaj njerëzve të pafajshëm,” tha Presidentja e Kosovës, Vjosa Osmani ndërsa Kryetari i Parlamentit shtoi:
“Për shkak se Serbisë nuk i ka mjaftuar që t’i vrajë shqiptarët dhe të asgjësojë ata, nuk është mjaftuar me kaq por edhe i ka djegur. E pikërisht për shkak të pamundësisë të identifikimit të tyre veç e veç, jemi detyruar si popull t’i varrosim shumicën prej martirëve në një vend të vetëm. Kjo është e pashembullt në botë. Ky është gjaku i martirëve, i kombit mbi të cilët janë ngritur me siguri të madhe themelet e shtetit dhe Republikës së Kosovës,” tha Glauk Konjufca duke shtuar se e vërteta e Serbisë janë krimet që ka bërë në Kosovë, meqë cak kanë qenë banorët e vendit të paarmatosur.
