Homazhe në Gjakovë, Albin Kurti: Vrasja e fëmijëve e pleqve dëshmon gjenocidin serb
Vrasja e fëmijëve, pleqve, grave dhe civilëve të pambrojtur, dëshmon gjenocidin e ushtruar të forcave serbe ndaj shqiptarëve në Kosovë, tha Kryeministri Albin Kurti pas homazheve në Gjakovë dhe Kralan, në nderim të rënëve në pranverën e vitit 1999.
“Vrasja e fëmijëve dhe foshnjave, e pleqve dhe plakave, e grave dhe civilëve të pambrojtur në pranverën e vitit 1999, në Kralan dhe Gjakovë, dëshmon gjenocidin e ushtruar të forcave serbe ndaj shqiptarëve në Kosovë,” tha Albin Kurti duke nderuar të rënët e familjeve Vejsa, Haxhiavdyli e Caka në Gjakovë, si dhe ata në Krelan.
Urdhërdhënësit, tha Kryeministri i Kosovës, kanë qenë dora e zgjatur e Millosheviçit, të cilët janë me dhjetëra e me qindra, prandaj ata duhet të përgjigjen para drejtësisë ndërsa përfundoi:
“Me kodin e procedurës penale dhe plotësim ndryshimin, ne, kemi mundësuar që kriminelët serbë të përndiqen, gjykohen dhe dënohen qoftë edhe në mungesë.”
Ndryshe, në masakrën e 2 Prillit në Kralan u vranë dhe ekzekutuan 80 civilë shqiptarë, ndërsa në Mahallën e Qerimit në Gjakovë, forcat serbe masakruan e vranë mbi 75 civilë shqiptarë ku i dogjën të gjallë e të vdekur anëtarët e familjeve Vejsa, Haxhiavdija e Caka, në mesin e të cilëve edhe fëmijët, Dalina 13 vjeçe, Dorina 10 vjeçe, Doruntina 9 vjeçe, Marigona 8 vjeçe, Delvina 6 vjeçe, Sihana 6 vjeçe, Egzona 4 vjeçe, Arlindi 4 vjeç, Rina 3 vjeçe, Diona 2 vjeçe dhe Rita një vjeçe.
