Homazhe për Ish-Presidentin Nishani, Berisha: Shteti shqiptar humbi një nga shtetarët më dinjitoz!

 Pas homazheve në nder të Ish-presidentit Bujar Nishani, Kryetari i PD, Sali Berisha, duke e cilësoi si një nga bashkëpunëtorët e tij më të çmuar tha se shteti shqiptar humbi një nga shtetarët më dinjitoz në tërë historinë e tij .

“Pikëllim. Për të ndarë me Odetën, Ersin dhe Fionën zinë e kësaj gjëmë të madhe që iu ka rënë atyre. Miqve të tyre, të afërmve, por edhe mbarë qytetarëve shqiptarë të cilët kanë parë të Bujar Nishani një qytetar shembullor, familja një prind të shkëlqyer, një bashkëshort dhe baba fisnik. Shtetit shqiptar, një nga shtetarët më dinjitoz në tërë historinë e tij, shoqëria shqiptare dhe shqiptarët, një nga shërbëtorët më të përkushtuar të tyre,” tha Ish-Presidenti Berisha i cili përveç bashkëpunimit foli dhe për një miqësi të përsosur me Bujar Nishanin.

“Bujar Nishani në dekada ka qenë një nga bashkëpunëtorët e mi më të çmuar me të cilin më lidhi jo vetëm bashkëpunimi i ngushtë por edhe një miqësi e përsosur. Një miqësi që nuk njohu ndonjëherë asnjë lloj të themi rrënje. Përkundrazi erdhi gjithmonë në forcim. Ai është përjetësisht i gjallë në memorien time dhe të gjithë atyre që patën fatin ta njohin atë si mik, si bashkëpunëtor të familjes që pati një bashkëshort dhe prind të tillë,” tha Kryetari i PD duke përfunduar:

“Duke ndarë sot dhimbjen dhe zinë në familjen Nishani, miqtë dhe të afërme të tij u shpreh ngushëllimet e mia atyre dhe shqiptarëve që humbën ish-kreun e shtetit që i dha dinjitet institucionit të Presidencës, i paharruar dhe i përjetshëm do mbetet kujtimi i tij.”