Hora e Arbëreshëve me memorial për Familjen Jasharaj dhe Epopenë e UÇK-së

Qeveria në detyrë e Kosovës ka marrë sot vendim për ngritjen e memorialit të Familjes Jashari dhe Epopenë e UÇK-së në Arbëshkun Hora në Itali.

Ky vendim u mor me qëllim të thellimit të bashkëpunimit me komunitetet arbëreshe, tha Kryeministri në detyrë, Albin Kurti, ndërsa shtoi se për këtë vendim ishin dakorduar me Kryetarin e Bashkisë Hora e Arbëreshëve, Rosario Petta.

“Ndër temat që kishim diskutuar dhe për të cilat ishim pajtuar, ishte edhe memorializimi i veprës dhe kujtimit të heroizmit të kryekomandantit tonë Adem Jashari dhe familjes së tij epike në këtë komunë arbëreshe në Itali.

Sot do të themelojmë Komisionin Profesional për përzgjedhjen e artistit apo grupit të artistëve për ngritjen e Memorialit për Familjen Jashari dhe Epopenë e Ushtrisë Çlirimtare të Kosovës në Hora e Arbëreshëve. Memoriali do të jetë donacion i Qeverisë së Republikës së Kosovës për arbëreshët në Itali,” tha Albin Kurti në mbledhjen e Qeverisë.

Ndahen 1.65 milionë euro për bursat e mobilitetit për studentë

Janë ndarë 1.65 milionë euro për grupin e parë të studentëve përfitues të Programit të Bursës së Mobilitetit për Studentë. Përfitues do të jenë rreth 10 mijë veta.

“Siç kemi njoftuar më parë, vlera e bursave ndryshon varësisht nga distancës prej vendit ku jetojnë dhe vendi ku studiojnë studentët. Kjo bursë synon që të zvogëlojë pabarazitë dhe të krijojë mundësi edhe për ata studentë, që vijnë nga zonat e largëta e që për ta studimet do të ishin më të kushtueshme”, tha Kurti gjatë mbledhjes.

Qeveria voton pro zbatimit të vendimeve të CEFTA-s

Qeveria në detyrë ka miratuar propozim vendimin e konfirmimit të obligimit të zbatimit të vendimeve të CEFTA-s dhe protokolleve të saj.

Kryeministri në detyrë, Albin Kurti tha se 16 vjet pas shpalljes së pavarësisë, largimi i UNMIK-un përmes marrëveshjes me CEFTA-n ka shënuar arritje historike për vendin.

“Sot, për vendimmarrje të qeverisë, kemi vendimet që janë aprovuar në Komitetin e Përbashkët të CEFTA-s, sikurse: tregtinë elektronike dhe bashkëpunimin digjital; barna më të sigurta dhe qasje më e shpejtë në to; mbështetje për bizneset përmes uljes së kostove doganore dhe të përshpejtimit të procedurave doganore; njohje e nënshkrimeve elektronike dhe qasje më e barabartë në shërbime digjitale pa geoblocking; si dhe konkurrencë e drejtë, që sjell zgjedhje më të gjera e çmime më të mira. Të gjitha këto vendime do të zgjerojnë dhe thellojnë tregtinë mes Kosovës dhe rajonit, si dhe qasjen graduale në tregun unik të Bashkimit Evropian. Arritje këto, që përkthehen, sigurisht, në më shumë vende pune, shërbime më cilësore dhe një Kosovë në përgjithësi më të sigurt e më prosperuese”, tha ai.

Gjatë mbledhjes u miratuan gjithashtu propozim vendimet për shpronësime të ndërmarrjeve private për nevoja të institucioneve shtetërore, duke përfshirë ato për realizimin e linjës ajrore te parku me erë në Zatriq, për ndërtimin e kyçjes së Vitisë në Autoudhën “Arbër Xhaferi”, Prishtinë – Hani i Elezit”.

Poashtu u morën vendime për shpronësime në interes të ndërtimit të rrugës tranzit Klinë – Gurakoc, zgjerimin e rrugës nacionale Prishtinë – Podujevë.

Kurti: Kosova ka qenë përherë e përkushtuar ndaj integrimit evropian

Kryeministri në detyrë, Albin Kurti, në mbledhjen e sotme të Qeverisë në detyrë ka përmendur sulmet terroriste nga shteti serb e mbështetjet financiare nga BE.

Kurti tha se Kosova ka qenë përherë e përkushtuar ndaj integrimit evropian, përmbushjes së kritereve për anëtarësim dhe vazhdimin si aleat e kampion të vlerave demokratike.

“Institucionet e Kosovës nuk ishin shkaktare të eskalimit të situatës në katër komunat në veri të vendit dhe de-eskalimi i situatës ishte pikërisht meritë e institucioneve të Kosovës. Ndërkohë Republika e Kosovës dhe institucionet e saj u bënë cak i sulmeve terroriste, prej të cilave dy me pasoja të rënda. Ai në Banjskë të Zveçanit me 24 shtator 2023, ku mbeti i vrarë rreshteri policor, heroi ynë Afrim Bunjaku dhe tjetri në kanalin Ibër – Lepenc në Varakë të Zubin Potokut me 29 nëntor 2024, që synonte dëmtimin e pariparueshëm të infrastrukturës kritike”, th ai.

Kurti tha se për të dyja rastet ka aktakuzë të ngritur, teksa për rastin e parë ekzistojnë dëshmitë që ka qenë plan serb për aneksimin e veriut përmes strukturave paramilitare. Gjithashtu për rastin e dytë provat konfirmojnë gjithashtu përfshirjen e drejtëpërdrejtë të shtetit serb.