Hoti i shqetësuar për tërheqjen e Ambasadës së SHBA nga monitorimi në KPK

Kryeministri i Kosovës, Avdullah Hoti, tha se është thellësisht i shqetësuar nga vendimi i Ambasadës së SHBA-së në Prishtinë, për tërheqje nga monitorimi i procesit të përzgjedhjes së kryeprokurorëve dhe anëtarëve të Këshillit Prokurorial të Kosovës.

“Shqetësimet e tyre duhet të merren seriozisht. Vetëm një proces transparent, pa asnjë konflikt interesi apo ndikimi politik, siguron përzgjedhje mbi baza të meritës,” tha Hoti në reagimin e tij përmes rrjetit social Facebook duke shtuar se Qeveria e Kosovës, përmes Ministrisë së Drejtësisë, po punon për reformën në drejtësi, përfshirë vettingun ndërsa përfundoi:

“Ky proces do të sigurojë një sistem të drejtësisë transparent, me llogaridhënie të brendshme dhe kontroll reciprok,” tha Hoti.

Ndryshe, Ambasada Amerikane është tërhequr pasi ka konstatuar se proceset e zgjedhjes së anëtarëve të rinj të Këshillit Prokurorial të Kosovës dhe kryeprokurorëve, janë prishur në themel.

“Ambasada Amerikane ka luajtur një rol monitorues dhe mentorues në proceset për të zgjedhur anëtarët e rinj të Këshillit Prokurorial të Kosovës (KPK) dhe për të zgjedhur kryeprokurorët. Fatkeqësisht, ne besojmë se këto procese tani janë prishur në themel. Atyre u mungon transparenca dhe u nënshtrohen konflikteve në rritje të interesit”, thuhet në deklaratën e Ambasadës duke saktësuar se se më nuk do të marrë pjesë në këto procese, pasi përfshirja e mëtejshme e Ambasadës mund të interpretohet në mënyrë të gabuar si një miratim i këtij sistemi të prishur.

“Prokurorët duhet të zgjidhen në bazë të kualifikimeve të tyre, jo në bazë të përkatësisë politike ose lidhjeve”, thuhet në deklaratë./RFE/