Hoti kërkon zgjidhje, Ramosaj: Rruga Deçan-Plavë do të ndërtohet patjetër

Kryeministri i Hashim Thaçit, Avdullah Hoti ka takuar sot edhe drejtuesit e Manastirit të Deçanit për të gjetur një zgjidhje për ndërtimin e rrugës Deçan-Plavë. Pas këtij takimi me klerikët fetarë të manastirit, Kryetari i Deçanit, Bashkim Ramosaj, tha se kjo rrugë patjetër se do të ndërtohet.

“Ne kemi jetuar të gjithë bashkë, kemi jetuar në të kaluarën bashkë dhe po ashtu zgjidhjet do t’i bëjmë të përbashkëta për të mirën e qytetarëve të Deçanit. Ka shumë konteste, zgjidhja është vetëm një, në të mirë të qytetarëve dhe të Manastirit. Patjetër që po, do ta ndërtojmë rrugën,” tha Ramosaj.

Ndërsa, kryeministri Hoti tha se janë dakorduar me Atin Sava Janjiç që të punojnë së bashku në javët e ardhshme, për të gjetur një zgjidhje që është e pranueshme për të gjithë.

“Biseduam që të gjejmë një zgjidhje dhe të bisedojmë në ditët dhe në javët e ardhshme për të gjetur një zgjidhje e cila sigurisht që merr parasysh interesat e qytetarëve të Deçanit, por po ashtu edhe nevojën për të ruajtur këtë vend të veçantë të trashëgimisë kulturore dhe fetare të Kosovës dhe mbarë botës. Ne u dakorduam që të punojmë së bashku në javët e ardhshme, për të gjetur një zgjidhje që është e pranueshme për të gjithë. Nuk po them për të gjitha palët sepse jemi një palë që i mbrojmë interesat edhe të qytetarëve dhe Manastirit të Deçanit si një vend i veçantë i trashëgimisë tonë kulturore dhe botërore,” tha Hoti.

Igumeni i manastirit të Deçanit, Sava Janjiç deklaroi se ky ishte një takim shumë i rëndësishëm pasi kemi folur për të gjitha problemet dhe aspektet e rrugës që duhet të ndertohet në mes të Deçanit dhe Plaves.

Janjiç tha se janë kundër ndërtimit të rrugës për në Plavë pasi kjo do të prishte qetësinë pasi andej do të kalonin shumë kamionë.

“Siç kam thënë edhe më heret ne e përkrahim ndërtimin e rrugëve që lidhin njerëzit dhe përkrahim idenë e zhvillimit ekonomik të komunës, por është me rëndësi qe të kemi parasysh se egziston Ligji për zonat e mbrojtura speciale që nuk lejon që rrugët magjistrale të ndërtohen në zonat e mbrojtura, dhe kjo do të ishte rrugë e karakterit magjistrale ndërkombëtare sepse lidhet me Malin e Zi. Prandaj këndej do të kalonin shumë kamionë dhe automjete që do të reflektonte ne vet manstirin, dhe në një qetësi që ne dëshirojm qe të gjithë ju që vini këtu ta ndjeni. Kështu që kemi biseduar për mënyra të ndryshme se si të gjindet një zgjidhje e përhershme e cila do të jet në përputhje me ligjin, dhe e cila do t’i përmbushë nevojat ekonomike të komunës dhe nga ana tjetër interesin për një jetë të qetë siç është e paraparë me ligj“, deklaroi Janjiç.

I pyetur se cila janë mundësitë për vazhdimin e punimeve në këtë rrugë, Janjiç deklaroi se këtë do ta zgjidhin në një të ardhme të afërt dhe se uron që ajo të jetë e kënaqshme për të gjithë.