Hoti nis punën si kryeministër i Hashim Thaçit
Me një ceremoni shtetërore, Avdullah Hoti, ka nisur sot detyrën si Kryeministër i Hashim Thaçit ndërsa zhvilloi edhe mbledhjen e parë.
Ai u prit nga Sekretari i Qeverisë së Kosovë meqë Kryeministri në largim, Albin Kurti e bëri të qartë përmes një video-mesazhi përmes rrjetit social Facebook se sot nuk do të jetë i pranishëm në ceremoninë e dorëzimit të detyrës, Kryeministrit Hoti me arsyetimin se këtë njeri e kishe shkarkuar si Zv/Kryeministër pasi u konfirmua se po punonte kundër Qeverisë dhe në shërbim të Thaçit.
“Nesër, nuk do ta bëj pranim-dorëzimin sepse nuk mund ta pranoj atë që e shkarkova, ndërkohë që edhe u dorëzua te presidenti. Ne vazhdojmë betejën. Do të kthehemi përsëri e shumë shpejt,” tha lideri i Lëvizjes Vetëvendosje, Albin Kurti.
Kryeministri i Kosovës, Avdullah Hoti, në mbledhjen e parë me kabinetin e ri tha se si qeveri e re e presin shumë sfida.
“Ju uroj punë të mbarë për sfidat që na presin si qeveri e re. Dua të falënderoj veçanërisht stafin mjekësor të cilët treguan profesionalizëm të lartë në menaxhimin e pandemisë COVID-19. Falenderim i veçantë edhe për policinë, stafin administrativ në nivel qendror e lokal, bizneset private, ndërmarrjet publike, e po ashtu ju shprehi ngushëllime familjeve të viktimave që janë prekur nga kjo pandemi dhe ne si qeveri do tu qëndrojmë afër,” tha Hoti me një artikulim pedagogu siç është, duke shtuar se e ka për obligim që të ti japë frymë demokracisë së brendshme në respektin të rendit dhe ligjit dhe ti nënshtrohet vetëm Kushtetutës.
“Do të punojmë bashkë në realizimin e një programi qeverisës me gjithë partnerët e këtij koalicioni duke qenë llogaridhënës ndaj gjithë deputetëve të Kuvendit, pozitë e opozitë, duke vendosur një diskurs të ri në skenën politike. Është një program ambicioz, besoj në këtë program dhe në këtë ekipe të shkëlqyeshme. Do tu dalim zot pritjeve të qytetarëve,” tha Hoti ndërsa renditi sfidat shkaku i pandemisë, siç është rimëkëmbja ekonomike.
Ndryshe, Avdullah Hoti është zgjedhur Kryeministër i ri i Kosovës me 61 vota për, 41 prej të cilave ishin të deputetëve shqiptarë ndërkohë ishin 57 deputetë që e kundërshtuan këtë Kryeministër të përzgjedhur nga Hashim Thaçi.
