Hoti: S’votojmë asnjë President; Kryetari i LDK: Do flasin organet e partisë; Pritet prononcimi i rojes…
Lidhja Demokratike e Kosovës ka zgjedhur Kryetarin e ri por siç u paralajmërua Lumir Abdixhiku nuk ka asgjë nën kontroll, madje as votën e vet. Ushtari i Isa Mustafës dhe Kryeministri në detyrë i Kosovës, Avdullah Hoti, ndonëse kurrë askush nuk e ka pyetur asgjë në LDK sot tha se Lidhja Demokratike e Kosovës nuk do ta votojë asnjë president.
“Ne nuk votojmë asnjë president ne jemi parti opozitare. I takon shumicës të bëjë konsultime për ta zgjedhur presidentin. Presidenti i vendit duhet të jetë jo politik,” tha Avdullah Hoti duke bërë sikur flet në emër të Isa Mustafës ndërsa, Kryetari i Lidhjes Demokratike të Kosovës, Lumir Abdixhiku, tha një gjë krejtësisht të kundërt:
“Nesër e kemi takimin bilateral me palën tjetër. Po, besoj që gjatë vikendit do të formojmë organet e partisë, siç është kryesia e LDK-së. Aty e marrim vendimin për të gjitha çështjet në koordinim me grupin parlamentar të LDK-së. Ajo çfarë kam thënë dhe iu lus ta transmetoni drejt se LDK-ja synon të shmangë zgjedhjet. LDK synon të kontribuojë në formimin e institucioneve dhe LDK synon që këto institucione të jenë demokratike dhe t’i përfaqësojnë të gjitha partitë politike, në veçanti pozita e presidentit. Për çështja tjera do ta kuptoni pas takimit të nesërm, kemi synime konstruktive,” tha Abdixhiku një ditë para takimit me Presidenten Vjosa Osmani dhe Kryetarin e LVV, Albin Kurti, ndërsa i pyetur nëse ka unitet në grupin parlamentar për votimin e Presidentit, Kryetari i ri i LDK, Lumir Abdixhiku shtoi:
“Për të qenë unik rreth diçka, duhet të definojmë se çfarë është ajo. Ne ende nuk e kemi kryesinë e partisë për të marrë vendimin se cila është rruga jonë përpara. Këtë rrugë sipas rregullave statutare të LDK-së, komunikojmë bashkë me GP të LDK-së. Deputetët e partisë sime i takoj shpesh, marrë vendime nga ta. Ata përfaqësojnë votuesin e LDK-së dhe zërin tonë parlamentar. Me kohë do të qartësojmë pozicionin tonë zyrtar.”
Ndryshe, pas prononcimit të Avdullah Hotit dhe Kryetarit të ri Lumir Abdixhiku, pritet prononcimi i rojeve të selisë të Lidhjes Demokratike të Kosovës pasi është e qartë se LDK vetëm parti nuk është!
