Hovenier: Jemi të shqetësuar për veprimet e fundit të Serbisë

Ambasadori i SHBA në Prishtinë, Jeffrey Hovenier tha se është i shqetësuar me veprimet e fundit të Serbisë dhe faktin që zëvendësdrejtori i Policisë së Kosovës, Dejan Jankoviç mbetet i ndaluar nga autoritetet e Serbisë.

“Jam në mënyrë të veçantë i shqetësuar për këtë  çështje si dikë për të cilën ne e njohëm për vite të tëra dhe që kemi ndihmuar në integrimin e komunitetit serb në Policinë e Kosovës pavarësisht etnisë dhe rolit të tyre të cilin e kanë luajtur dhe vazhdojnë ta luajnë në Policisë së Kosovës, përfshirë edhe në ruajtjen e trashëgimisë kulturore të Kosovës,” tha Ambasadori amerikan Jeffrey Hovenier pas takimit me Presidenten e Kosovës, Vjosa Osmani.

Në këtë takim, tha ai, përveç  çështjes së ndalimit të zyrtarëve policorë të Kosovës dhe qytetarëve kosovarë në kufijtë e Serbisë, me Presidenten Osmani kanë biseduar edhe për shumë  çështje tjera, përfshirë forumin për gratë, të cilin e ka vlerësuar si ‘shumë të suksesshëm, si dhe për aplikimin e Kosovës në Këshillin e Evropës.

“Ne kemi diskutuar me Presidenten se si Kosova të ketë sa më tepër sukses në këto çështje,” tha Ambasadori Hovenier duke shtuar se Serbia shkeli marrëveshjen për lirinë e lëvizjes me veprimet e djeshme.

“Ne vazhdojmë të punojmë me Bashkimin Evropian dhe jemi të përfshirë në procesin e dialogut dhe dëshirojmë që këto të zbatohen dhe deklarata e BE-së është e qartë dhe ne nuk është që nuk dakordohemi me atë deklaratë të BE-së dhe ne kërkojmë që të gjitha marrëveshjet e arritura në dialog të zbatohen dhe ne vazhdojmë të punojmë së bashku.”

I pyetur për takimin e sotëm në Bruksel të kryenegociatorëve rreth zgjidhjes së çështjes së dinarit serb, Ambasadori amerikan tha se e ka të vështirë të flasë se çfarë mund të ndodhë me këtë takim.

“Unë mund të them që ne shpresojmë të shohim që kjo çështje do të zgjidhet dhe ne nuk e vëmë në dyshim autoritetin e Bankës Qendrore të Kosovës për të rregulluar sektorin financiar. Edhe ne e kuptojmë rëndësinë dhe nevojën për të luftuar ose ngushtuar hapësirën e manovrimit për pastrimin e parave dhe çështje të tjera kriminale por duhet pasur parasysh edhe ndikimin e këtij vendimi për qytetarët në mënyrë të veçantë ata serbë,” tha Ambasadori i SHBA në Prishtinë, Jeffrey Hovenier, duke vlerësuar angazhimin për të gjetur zgjidhje në lidhje me këtë çështje në dialog dhe se shpresojnë që kjo çështje do të zgjidhet nga të dyja palët dhe personat e ndjeshëm që preken nga këto vendime do t’i marrin benifitetet e tyre financiare ndërsa përfundoi:

“Fokusi ynë duhet të jetë zbatimi në mënyrë të plotë i Marrëveshjes së Ohrit!”