Hovenier: Ka aktorë të huaj që duan ta minojnë demokracinë e Kosovës

Ambasadori i Shteteve të Bashkuara në Prishtinë, Jeffrey Hovenier, tha se në Kosovë ka aktorë të huaj keqdashës aktivë që duan të minojnë demokracinë duke i shfrytëzuar përçarjet etnike.

I përkushtuar që kjo mos të lejohet të ndodhë, në konferencën për integritetin e informacionit DISICON, të organizuar nga Instituti Kombëtar Demokratik, Ambasadori amerikan tha se dezinformimi mund të ketë pasoja të drejtpërdrejta gjithmonë, veçanërisht gjatë periudhës zgjedhore, në të cilën Kosova ndodhet aktualisht përpara zgjedhjeve të 9 shkurtit.

Jeff Hovenier i kujtoi audiencës një bisedë të rreme të publikuar në rrjetet sociale disa vite më parë, mes tij dhe Kryeministrit Kurti dhe që kishte për synim të mbillte mosbesim brenda komunitetit serb të Kosovës.

Ambasadori amerikan tha se SHBA mbetet e përkushtuar ndaj Kosovës si një vend i larmishëm dhe në mbështetje të medieve të pavarura, përfshirë ato që drejtohen nga pakicat.

“Ne jemi shumë të vetëdijshëm për mediet që ofrojnë informacion të paanshëm dhe të saktë. Jemi të vetëdijshëm se ka disa që përpiqen të shfrytëzojnë këtë pretendim për të bërë diçka krejtësisht tjetër, për të dhënë një mesazh që synon qëllime shumë, shumë të ndryshme nga informimi i komunitetit. Kjo duhet të denoncohet dhe ne duhet t’i mbështesim mediet e pavarura,” tha Ambasadori i Shteteve të Bashkuara në Prishtinë, Jeffrey Hovenier.

Një ditë parë, në këtë konferencë është prezantuar studimi i Qendrës Kosovare për Studime të Sigurisë, ku u tha se fushatat dezinformuese në vend, shpërndahen qëllimshëm për t’i tensionuar marrëdhëniet ndëretnike. Nga ky studim del që shumica e kosovarëve, pavarësisht etnisë, besojnë se dezinformimi po ndikon në marrëdhëniet ndëretnike.