Hovenier: Përfundimi i dialogut Kosovë-Serbi duhet të jetë njohja reciproke
Ambasadori i Shteteve të Bashkuara në Kosovë, Jeffrey Hovenier, tha sot se dialogu ndërmjet Kosovës dhe Serbisë duhet të përfundojë me njohje reciproke dhe jo diçka më pak se kjo.
“Përfundimi i këtij procesi duhet të jetë njohja e ndërsjellë mes dy vendeve, sepse diçka më pak se kjo nuk e përmbush këtë vizionin që e kemi për një Evropë të plotë, të lirë, të begatshme dhe në paqe, sidomos duke marrë parasysh paqëndrueshmërinë e mundshme që mund të pasojë,” tha Ambasadori Hovenier në fjalën e tij në Samitin “The Western Balkans 2024” duke e bërë të qartë se për sfida politike si dialogu, duhet angazhim kolektiv
Sot, tha Ambasadori amerikan në Kosovë, se është e rëndësishme që të zbatohen marrëveshjet që dy shtetet kanë arritur në kuadër të dialogut.
“Ka një varg zyrtarësh amerikanë, përfshirë dhe mua, që kalojmë shumë kohë për zbatimin e plotë të obligimeve që Kosova dhe Serbia i kanë marrë në procesin e lehtësuar nga BE-ja,” tha Ambasadori i Shteteve të Bashkuara në Kosovë, Jeffrey Hovenier, duke përsërit qëndrimin se SHBA nuk pajtohet me një deklaratë të miratuar më 8 qershor nga Serbia dhe Republika Srpska ku Kosova trajtohet si pjesë e patjetërsueshme e Serbisë.
