Humb jetën një ushtar amerikan në Kosovë

Departamenti amerikan i Mbrojtjes njoftoi se ka humbur jetën një ushtar amerikan, që shërbente në Kosovë.

Ushtari Alexander Blake Klass, 20 vjeç, nga Uillamina e Oregonit, ka vdekur si “rezultat i një incidenti joluftarak më 4 korrik, në kampin në Novo Sellë, Kosovë”, thuhet në njoftim.

Sipas njoftimit, hetimet lidhur me këtë ngjarje kanë filluar.

Klass ishte pjesë e Batalionit 2, Regjimenti i 162-të i Këmbësorisë, Ekipi Luftarak i Brigadës së Këmbësorisë në Gardën Kombëtare të Oregonit, njoftoi Departamenti amerikan i Mbrojtjes.

Në Kosovë, raporton RFE, në kuadër të misionit paqeruajtës të NATO-s, të njohur si KFOR, janë të angazhuar 460 ushtarë amerikanë, nga 4.000 trupa sa janë në total.