Hungaria iu thotë lamtumirë maskave

Hungaria do të heqë shumicën e kufizimeve ndaj pandemisë, duke përfshirë masën e izolimit gjatë orëve të natës, sapo që numri i të vaksinuarve të arrijë 5 milionë këtë fundjavë, tha të premten kryeministri i Hungarisë, Viktor Orban.

Orban tha për radion shtetërore se nuk do të ketë më nevojë që banorët të mbajnë maskat në ambiente të hapura.

“Kjo do të thotë që ne kemi mundur valën e tretë të pandemisë,” tha Orban duke shtuar se ka ardhur koha për t’i thënë lamtumirë maskave në vendet publike.

Hungaria është i vetmi vend i Bashkimit Evropian që ka miratuar dhe përdorur vaksinën Sputnik të Rusisë dhe ato kineze.

Kjo i ka mundësuar këtij vendi që të arrijë një nga nivelet më të larta të vaksinimit në BE. Rreth 50% e popullsisë prej rreth 10 milionësh, tashmë kanë marrë të paktën njërën dozë të vaksinës.

Shumica e bizneseve tashmë janë hapur, raporton RFE, duke përfshirë hotelet, restoranet pastaj teatrot, kinematë, palestrat dhe vendet tjera sportive.

Vitin e kaluar ekonomia e këtij vendi u tkurr për 5 për qind. Kryeministri Viktor Orban tha se rritja ekonomike këtë vit pritet të jetë më e lartë se parashikimi aktual i qeverisë prej 4.3 për qind.