Hungaria propozon emrin e komisionerit të ri të BE-së

Qeveria e Hungarisë ka propozuar ambasadorin e vet ne BE, Oliver Vahyi për kandidat për komisioner në mandatin e ardhshëm të Komisionit Evropian, KE, raporton RFE.

Propozimi zyrtar tashmë ka arritur ne selinë e KE-së, ka konfirmuar zëdhënësja e këtij institucioni, Mina Andeeva.

Andeeva ka tërhequr vërejtjen se propozimi i emrit të ri nuk nënkupton më automatizëm edhe nominimin, meqë kandidati në fjalë duhet t’i nënshtrohet procedurave fillestare ku përfshihet intervista e drejtpërdrejtë me Presidenten e ardhshme të KE-së, Ursula von der Leyen, kontrolli në Komitetin për çështje juridike pranë Parlamentit Evropian, dhe në fund dëgjimi për konfirmim në të njejtin institucion.

Zëdhënësja e KE-së nuk është përgjigjur në pyetjen, nëse kandidati i ri hungarez, do ta ketë portofolin e zgjerimit, sikurse paraardhësi i tij, Laszlo Troscanyi.

“Në këtë moment nuk dëshiroj të spekuloj në lidhje me vendimet e presidentes së zgjedhur të Komisionit Evropian, para se ajo t’i kryej intervistat me kandidatët e rinjë,” tha Andeeva.

Ndryshe, Komiteti për çështje juridike i Parlamentit Evropian konstatoi se kandidatja nga Rumania, Rovana Plumb si dhe ai nga Hungaria, Laszlo Troscanyi, nuk mund të bëhen komisioearë evropian meqë tek ata është gjetur konflikti i interesit.

Në Komisionin Evropian është konfirmuar se menjëherë pas këtij vendimi, Ursula von der Leyen, presidentja e zgjedhur e KE-së ka biseduar me kryeministrat e Hungarisë, përkatësisht Rumanisë, nga të cilët ka kërkuar që të dalin sa më shpejtë me propozime të reja.

Qeveria e Hungarisë mbrëmë doli me emrin e diplomatit, Oliver Vahyi, ndërsa Rumania akoma nuk ka propozuar emër tjetër.

Më 23 tetor, Parlamenti Evropian duhet të votoj në pako tërë kabinetin e ri të propozuar nga Ursula von der Leyen, gjë që bëhet pas dëgjimeve konfirmuese të cilat tashmë kanë nisur në PE me të gjithë 26 kandidatët e propozuar.

Kabineti i ri i Komisionit Evropian nis mandatin më 1 nëntor të këtij viti.