Hyri si Kryetar i Bashkisë Tiranë në SPAK, Erion Veliaj del si kolegë i prokurorëve të posaçëm

Tetë orë në Prokurorinë e Posaçme kundër Korrupsionit dhe Krimit të Organizuar të Republikës së Shqipërisë bënë çudinë me Kryetarin e Bashkisë Tiranë, Erion Veliaj, edhe pse hyri dhe doli gënjeshtar, çuditërisht doli dhe kolegë i prokurorëve të SPAK-ut, për të cilët, në sqarimin para mediave, tha se ishte marrë në pyetje.

Ndonëse u konfirmua se kishte gënjyer kur tha se kishte shkuar vullnetarisht në SPAK sepse u zbulua ndërkohë se ishte thirrë nga prokurori i posaçëm Dritan Prençi, për dosjen e inceneratorit të Tiranës, askush nuk e bëri dot as lidhjen e “Kolegut Prençi” me njeriun që askush nuk i tha puna e mbarë, bëri ca protesta me bidona uji kundër Fatos Nanos, dhe pas ca mashtrimeve me eurodeputeten Tanja Fajon dhe “Kanibalët e Saiut” që nxjerrin fëmijë nga barku i bashkëshortes së një kryebashkiaku socialist, dhe bojatisjes së kokave të protestuesve “me gjak” më 21 Janar, u bë dhe kryebashkiak i Tiranës.

Gjithsesi, pas tetë orëve në SPAK, me nurin e kopjuar të kolegut të tij hajdut Ilir Beqja, Kryetari i Bashkisë Tiranë nuk e bëri dot as atë që e ka dhunti, aktrimin.

“Falënderoj kolegët e SPAK. Një institucion me të cilën unë nuk kisha të bëja përpara por që pas këtij takimi ma ka rritur bindjen se është bërë një investim për së mbari në Shqipëri. Është krijuar një institucion serioz. Isha me dy kolegë hetues profesionist të disiplinuar dhe unë them që e vetmja gjë që mund të bëjmë është të mos përgojojmë institucionet, por t’i forcojmë. Isha këtu si bashkëpunëtor.

Kisha kohë që kisha kërkuar një takim. Po diskutonim sot orën 9 me 10 pasi kishte edhe një seancë tjetër. Patëm një ezaurim total të çështjes së inceneratorëve. Gjithë shpjegimet e nevojshme për mënyrën se ku dallon projekti i IFC, i cili u rrëzua dhe ishte nisur nga ish-bashkia me 37 euro toni. Ky proces ishte komplet gjë tjetër, e pa kërkuar nga investitor të tjerë dhe që nuk kishin lidhje me bashkinë e Tiranës dhe që nuk kishin lidhje me IFC. Sigurisht që u thanë edhe disa detaje të tjera,” tha Erion Veliaj i painformuar se për tetë orë sa qëndroi në SPAK shumëçka ishte zbuluar rreth thirrjes nga ana e prokurorit të posaçëm, dhe vazhdoi për “kolegët” e tij në Prokurorinë e Posaçme:

“Të dy kolegët hetues më kërkuan që për çështje të sekretit hetimor, duke qenë se Bashkia e Tiranës ka sjellë edhe disa prova të tjera, mu kërkua që të mos i ndaj me gazetarët. Sigurisht do të jenë pjesë e zbardhjes së dëshmisë time. Unë dhe bashkëpunëtorët e mi ndihen më të lehtësuar. Pata mundësinë që të them fjalën time. Besoj edhe armiqtë e mi ndihen më të lehtësuar. Njeriu duhet gjykuar edhe nga armiqtë të bën dhe jo vetëm nga punët që bën,” tha Kryetari i Bashkisë Tiranë, Erion Veliaj në përpjekje për të bindur shqiptarët se është i pashqetësuar edhe pas kësaj seance tetëorëshe të marrjes në pyetje në Prokurorinë e Posaçme.

Dhe, që është i pashqetësuar Erion Veliaj e tradhtoi shfaqja në mbledhjen online të Këshillit Bashkiak ku nga SPAK-u deri në zyrën e tij në Bashkinë Tiranë, ku u fut si mi mulliri ndër shalët e forcave speciale të policisë që kishin fortifikuar Bashkinë për shkak të protetstës qytetare, u informua si për lajmet që ishin publikuar ashtu dhe postimin e munguar të Kryeministrit Edi Rama në shenjë mbështetjeje.

Pavarësisht se asnjë televizion kombëtar nuk e dha sot lajmin për prezencën e tij në SPAK ashtu si dhe mbrojtjen që i bënë, ai shfryu gjithë dufin tetëorësh në një televizion dhe një emision që e kishin zbardhur skemën e vajtjes së tij sot në SPAK, ku nuk kurseu as mikun e shtrenjtë të Kryeministrit, Baton Haxhiun, që sot thotë se nuk e duan në Kosovë.

“Secili prej analistëve ka kërkuar diçka në Bashkinë e Tiranës. E di ai çfarë ka kërkuar Ben Rreli për atë portalin, që nuk jepet leje në Kopshtin Zoologjik; E di ai tjetri çfarë ka kërkuar për sondazhet që nuk i bën dhe faturon shifra të panevojshme, dhe kur s’e duan në Kosovë, në Shqipëri e shohin akoma më me përbuzje. Prandaj vlerësohet Tirana edhe në Kosovë, se njerëzit më të poshtër, që ata i kanë përzënë, nuk qasen në Bashkinë e Tiranës dhe nuk kanë pikë aksesi.

Ai që ka ndërtuar pallat në mes të Bllokut e ka shumë kollaj të bëjë emision, se ky kryetar bashkie nuk e lë më të bëjë pallat në mes të Bllokut, duke ia vjedhur tokën e vet motrave Saleziane. Asnjë të mos ketë asnjë iluzon, secili prej atyre që është aty përballë ka interesin e tij, ka fundshpinën e vet interes, nuk i qan halli as për pastrimin, as për ndërtimin e shkollave, por ka vetëm një llogari,” tha Erion Veliaj duke folur në mbledhjen online të Këshillit Bashkiak dhe çuditërisht njeriu që kurrë nuk i ka dhënë llogari askujt, siç tha edhe para SPAK-ut, sot foli dhe për llogaridhënie ndonëse çdo që frymon në Bashkinë që ai drejton, vjedhin.

“Unë llogarinë e kam me qytetarët e Tiranës dhe unë jam krenar që shumica dërrmuese e llumit të analistëve, që nuk kanë qenë mentori i askujt, që nuk i kanë thënë bravo askujt, që nuk kanë rritur asnjë talent të ri edhe t’i thonë ‘ec përpara, shkëlqe’, ‘jam krenar për ty’. Por përkundrazi, sa shohin dikë, i keni parë, janë burra nga 55-60-65-vjeç, që rrinë natën në televizione, sikur janë te ‘peshqirat’, sikur shikojnë Pornhub, dhe të eksituar si ata pitbullët, shqyejnë çdo gjë të re që u kalon përpara,” tha Kryetari i Bashkisë Tiranë, Erion Veliaj i cili kishte urdhëruar mbledhjen online dhe erdhi për të provokuar protestuesit para Bashkisë, duke përfunduar:

“Jam krenar për punët dhe jam krenar për të gjithë llumin e bashkuar kundër nesh, se njerëzit e drejtë vlerësohen jo vetëm çfarë punësh kanë bërë, por edhe sa kanë frymëzuar armiqtë dhe fundërrinat e këtij qyteti të bëhen bashkë si kurrë më përpara. Ata kanë harruar gjithçka kanë thënë për njeri-tjetrin, vetëm të bllokohet puna, vetëm të bllokohet e mira, vetëm të bllokohet progresi.”