I biri i Trumpit në Beograd: Babai im ishte afër zgjidhjes së kontesteve të Serbisë me fqinjët, Merkel shkatërroi gjithçka

I biri i Ish-Presidentit amerikan dhe kandidatit aktual republikan për President të SHBA, Donald Trump, mbrëmë në një takim të paparalajmëruar me biznesmenë serbë në Beograd ka fol për mundësitë e humbura të Serbisë kur babai i tij ishte president, për shkak të ish-kancelares Angela Merkel, dhe të ardhmen e tyre me Presidentin Trump.

Në këtë takim, sipas medias serbe N1, në këtë takim nuk ishte asnjë përfaqësues i Qeverisë së Serbisë ndërsa Ambasada amerikane në Beograd nuk e ka komentuar vizitën e tij në Beograd.

Duke fol për situatën aktuale në Shtetet e Bashkuara, ai vlerësoi se në katër vitet e fundit vendi ka shkuar nga prosperiteti në varfëri, nga paqja në luftë, nga arsyeja në çmenduri.

“Kjo më kujton atë që kam kaluar para shumë viteve,” tha ai duke vlerësuar se bota sot është në kaos të vërtetë, si dhe në gjithë botën ekonomitë janë në katastrofë.

“Babai im ishte shumë afër që të zgjidhë disa nga kontestimet e Serbisë me shtetet fqinje,” tha ai në fjalën e tij, por ishte Angela Merkel që gjithiçka shkatërroi, konfirmoi me këtë rast i biri i Trumpit atë që shqiptarët e njohin si shpëtim të ndarjes së Kosovës nga Kancelarla Merkel, për të cilën ndarje ishin angazhuar shumë Presidenti i Serbisë, Aleksandar Vuçiç, dhe Kryeministri i Shqipërisë, Edi Rama!

“E di se në SHBA jeton një numër i madh i serbëve. Më është thënë se janë konservator dhe e kam të qartë pse. Sepse punojnë shumë, fitojnë, e kanë të rëndësishme familjen, zhvillojnë biznesin,” tha Trumpi i Ri duke ju bërë thirrje serbëve që jetojnë në SHBA të votojnë sepse e dinë që nuk e kanë “trurin e shpëlarë”, dhe se do ta kenë mirë nëse fiton sërish babai i tij, raporotn e përditshmja serbe Danas.

“Mendoj se babai im në katër vitet e ardhshme do të krijonte marrëdhënie të mira me Serbinë për dallim nga ajo se çfarë po ndodhë,” tha Trumpi i Ri duke theksuar se marrëdhëniet e SHBA dhe Serbisë do të ishin të shkëlqyera sikur Angela Merkel mos të ndërhynte.

Trumpi i Ri u largua nga Beogradi mëngjesin e sotëm dhe në mbrëmje ka takim me biznesmenët në Bukuresht, për dallim nga ai në Beograd që takimi është paralajmëruar në mediat rumune, raporton N1.

Ndryshe, Donald Tramp i Riu është Zv/Presidenti ekzekutiv i Organizatës Trump dhe drejton kompaninë së bashku me vëllaun e tij më të ri Erikun. Kompania e tij ka punuar me qeveritë e huaja në kohën kur i ati i tyre Donald Trump ishte Presidenti i SHBA, që nuk u pëlqye fortë nga opinioni amerikan.

Trumpi i Ri ka marrë pjesë në mënyrë aktive në fushatën presidenciale të të atit në vitin 2016, kur u takua me avokatin rus i cili premtoi informacione të dëmshme për fushatën e kundërkandidates së Trumpit, Hillary Clinton.

Ai ishte aktiv edhe në fushatën presidenciale të të atit në vitin 2020. Pas humbjes së Donald Trump nga Joe Biden, Trump i Riu ishte njëri ndër promotorët më të zëshëm të teorisë së komplotit për zgjedhjet e vjedhura dhe u bëri thirrje mbështetësve të të atit në “luftë totale, arsye për të cilën prokurori i Columbias shqyrtoi mundësinë që ta akuzoi për nxitje të sulmit të dhunshëm në Capitol të SHBA i cili ndodhi më 6 janar 2021.