I dërguari i Gjermanisë për Ballkanin: Serbia nuk mund të anëtarësohet në BE pa e njohur Kosovën!

Serbia nuk mund të bëhet anëtare e Bashkimit Evropian pa e njohur Kosovën. Kështu është shprehur për mediat serbe I Dërguari special i Gjermanisë për Ballkanin Perëndimor, Manuel Sarrazin.

BE është në krye të negociatave ndërmjet Beogradit dhe Prishtinës, tha Manuel Sarrazin në një intervistë për “Nova duke shtuar se është e rëndësishme që përfaqësuesit e serbëve të rikthehen në institucionet e Kosovës sa më shpejt, dhe është e nevojshme të arrihet një marrëveshje ndërmjet dy palëve sa më shpejt të jetë e mundur

Duke iu referua mesazheve të mëparshme nga Beogradi, se presidenti i Serbisë “nuk i beson Gjermanisë”, diplomati gjerman, ai tha se Gjermania nuk është e kënaqur me përparimin demokratik të Serbisë, dhe në të njëjtën kohë paralajmëroi se ka dyshime nga ekonomia gjermane se si po zhvillohet Serbia aktualisht.

Në pyetjen se si i sheh Gjermania protestat e serbëve dhe barrikadat e vendosura në veri, Sarrazin tha se situata në veri të Kosovës, nga pikëpamja gjermane, ishte shumë e rrezikshme.

“Ajo është ende shumë e rrezikshme. Kemi një situatë ku shërbimet themelore shtetërore, siç janë shërbimet e sigurisë, aktualisht nuk mund të ofrojnë siguri për serbët, por edhe për qytetarët e tjerë të Kosovës. Prandaj mendoj se është e rëndësishme të përshpejtohet procesi i kthimit të serbëve në institucionet e Kosovës,” tha diplomati gjerman duk eshtuar se i kupton emocionet e serbëve nga veriu i Kosovës, por më e rëndësishmja edhe për ta, është që bashkësia ndërkombëtare të bëjë gjithçka për të parandaluar përshkallëzimin e konfliktit.

“Kjo është një nga arsyet pse ne mbështesim Miroslav Lajçakun dhe Bashkimin Evropian që të kontribuojnë në de-përshkallëzimin e situatës në terren përmes dialogut ndërmjet Kosovës dhe Serbisë. Ne e kemi të qartë se gjithçka nuk ka përfunduar ende, por të paktën tensioni është dukshëm më i ulët se sa ishte në dhjetor.”, tha ai.

Me këtë rasti ai sqaroi nëse nënkupton propozimi gjermano-francez, se Serbia duhet të njohë pavarësinë e Kosovës në fund të procesit negociator.

“Ne nga Gjermania gjithmonë kemi pasur një qëndrim shumë të qartë për këtë çështje, në fund të procesit të normalizimit të marrëdhënieve, kur Serbia të vendosë për anëtarësim në BE, njohja e Kosovës do të jetë pjesë e procesit. Nuk do ta lidhja shumë me propozimin evropian, por është diçka që sigurisht e pret Gjermania dhe kjo u tha qartë kur kancelari Olaf Scholz vizitoi Serbinë në qershor të vitit të kaluar,” tha duke shujatur kuriozitetin se pse nuk bëhet publik propozim franko-gjerman.

“Të gjithë mendojnë se është më mirë që fillimisht të krijohet një atmosferë mirëkuptimi dhe besimi ku drejtuesit mund të flasin për temën pa menduar se diçka do të publikohet. Në të njëjtën kohë, e kuptoj se për popullin e Serbisë dhe Kosovës kjo është një temë e rëndësishme dhe delikate, jo vetëm për politikanët, por edhe për të ardhmen e dy vendeve dhe se nuk është publikuar si e tillë dhe se për këtë arsye,” tha Sarrazin sipas të cilit debati publik reduktohet në disa thashetheme dhe informacione që shpeshherë nuk janë të sakta.

“E kuptoj interesin, por gjithashtu i bëj thirrje njerëzve që të kuptojnë situatën delikate dhe të binden se kjo është rruga e duhur,” tha Sarrazin duke mos dhënë ndonjë afat kohor se kur mund të publikohet propozimi.

“Nuk mund ta parashikoj këtë, sepse nuk mbaj përgjegjësi për atë që ndodh në këtë proces. Unë vetëm mund t’ju përcjell këndvështrimin tim të sinqertë për këtë proces, i cili besoj se është shumë i dobishëm dhe ofron mundësi të mëdha për të dyja palët për të hequr qafe të kaluarën, por edhe për të çliruar potencialin e madh që ka rajoni në rrugën drejt Evropës. Mendoj se ky debat po zhvillohet në atë drejtim që të dy liderët, Vuçiq dhe Kurti, t’u jepet mundësia që të jenë më të qartë dhe më të sinqertë në prezantimin e synimeve të tyre strategjike në dialog.”

Në fund, I Dërguari Special i Gjermanisë për Ballkanin Perëndimor, Manuel Sarrazin, tha edhe sikur të arrihet një marrëveshje, nuk do të jetë fundi i procesit.

“Do të ketë ende shumë punë, por do të ishte një hap i madh përpara dhe mendoj se do të përfaqësonte një mundësi të madhe për rajonin. Kjo është një mundësi e madhe dhe ne shohim shumë më tepër biseda, jo vetëm për dialogun, por edhe për vetë rajonin.”