I lodhur nga pandemia, jep dorëheqje ministri i Shëndetësisë në Austri

Ministri i Shëndetësisë i Austrisë, Rudolf Anschober, tha sot se jep dorëheqje pasi ndihet i rraskapitur nga lufta me pandeminë e koronavirusit.

“Në krizën më të rëndë shëndetësore në dekada, republika ka nevojë për një ministër të Shëndetësisë, i cili është 100% i aftë. Ky, aktualisht, nuk jam unë,” tha Anschober duke përmendur problemet që ka me tensionin e gjakut.

“Kam marrë një punë shumë të bukur dhe sfiduese 15 muaj më parë. Më duket sikur nuk kanë kaluar 15 muaj, por 15 vjet.”

Anschober ka marrë detyrën në janar të vitit 2020, përpara se pandemia të godiste Austrinë. Ish-gazetari 60 vjeç, Rudolf Anschober është një nga politikanët më popullorë të Austrisë, i njohur për shpjegimet e tij të gjata të sfidave të pandemisë. Ai shpesh ka qenë zë i vetëm në qeveri kur ka kërkuar masa më të rrepta bllokimi, përballë numrit të lartë të infeksioneve me koronavirus.

Rudolf Anschober, raporton RFE, tha sot se nuk ka pasur asnjë ditë të plotë pushimi për më shumë se një vit – gjë që ka dëmtuar shëndetin e tij.

Austria, vend me 8.8 milionë banorë, ka regjistruar mbi 578.000 raste me koronavirus dhe mbi 9.700 viktima.