I lutet gjykatës/ Terroristi rus: Mos më deportoni në Rusi, do më vrasin!

Shtetasi rus, Rasul Mislaev, 34 vjeç, lindur dhe banues në Norilsk, Rusi, i arrestuar në Tiranë pasi ishte në kërkim ndërkombetar për pjesëmarrje në organizatë terroriste, sot ka kërkuar në gjykatë që të mos deportohet në Moskë.

Gjykata e Durrësit, pasi mori në shqyrtim kërkesën e autoriteteve ruse për ekstradimin e tij, vendosi të shtyje seancën deri më 10 shtator, në mënyrë që avokati të ketë kohë të njihet me dosjen.

“Mos me deportoni në Rusi, atje do të më vrasin,” tha terroristi rus në gjykatë.

Ky shtetas ka ardhur si emigrant i paligjshëm në Shqipëri dhe ishte shpallur në kërkim nga Interpol Moska, pasi Gjykata e Rrethit Gjyqësor në Nadterechni, republika Çeçene / Rusi, me vendim penal të datës 08.04.2015, ka lëshuar urdhër – arrestin për këtë shtetas, për veprën penale “Pjesëmarrja në organizatë terroriste”, parashikuar nga Kodi Penal rus.

Në Qershor të vitit 2013 ky shtetas është larguar nga Rusia për në Siri, ku i është bashkuar një grupimi ilegal të armatosur, të ashtuquajturit “Shteti Islamik” (ISIS), duke qenë pjesëmarrës aktiv në luftime kundër forcave qeveritare në Siri.

Materialet e para hetimore të kryera për këtë ngjarje, i janë referuar Prokurorisë Pranë Gjykatës së Shkallës së Parë për Krime të Rënda Tiranë, për veprën penale “Pjesëmarrja në veprime luftarake në një shtet të huaj”, parashikuar nga neni 265/a i Kodit Penal të Republikës së Shqipërisë.