I pakorrigjueshëm, Basha: Edi Rama duhet të ikë!
Një ditë pasi u dokumentua e kaluara kriminale e Valdrin Pjetrit dhe “reflektimit” që u mundua ta shes Kryeministri për përzgjedhjen e Pjetrit si kandiat për Kryetar të Bashkisë Shkodër, Kryetari i Partisë Demokratike, Lulzim Basha, tha se ata që mendojnë se Edi Rama mund të kufizohet, mund të reformohet apo mund të korrigjohet, janë, në rastin më të mirë, naivë të rrezikshëm. Edi Rama është i zhytur në krim dhe mbijetesa e tij politike është e lidhur me krimin: Edi Rama duhet të ikë!
“Unë e di që problemi kryesor që ndjejnë shqiptarët është ekonomia, varfëria, papunësia, të cilat godasin direkt jetët e shqiptarëve. Shqipëria ka shumë mundësi për të gjithë. Shqipëria ka mundësi të mos ketë papunësi, të mos ketë varfëri, por kjo gjë kërkon që qeveria të punojë për njerëzit, që ekonomia të ofrojë mundësi për të gjithë. Kjo nuk mund të arrihet me një politikë të kapur nga krimi dhe nga një grusht oligarkësh.
-Një qeveri e pakicës punon për pasurimin e pakicës. Një qeveri që vjen në pushtet nga krimi dhe mbahet në pushtet nga krimi do t’i shërbejë krimit.
-Një qeveri që vjen në pushtet me paratë dhe mbështetjen e oligarkëve, do t’u shërbejë oligarkëve
Duke risjellë në vemendjen e shqiptarëve bumin e ndërtimit në Tiranë dhe koncesionet kriminale me kosto të fryra në mënyrë marramëndëse, lideri i opozitës tha se të gjitha janë në shërbimi dhe favoret që Edi Rama u bën krimit dhe oligarkëve, ato janë varfërim i shqiptarëve të thjeshtë.
“Edi Rama nuk i ka shërbyer kurrë popullit dhe nuk do t’i shërbejë kurrë popullit. Ai është kryeminsitri i krimit, kyeministri i oligarkëve dhe do jetë i tillë deri në ditën e fundit që do të jetë në pushtet.”
Vetëm një qeveri qe vjen me votën e lirë të njerëzve, të popullit, punon për popullin, përsëriti Kryetari i Partisë Demokratike, ndaj përpjekjet për ekonominë, për punësimin, për përparimin do të japin rezultat vetëm kur të zgjidhet problemi më i madh politik:
Çlirimi i politikës nga krimi dhe oligarkët
Në fund, Kryetari i Partisë Demokratike, Lulzim Basha, e bëri të qartë se edhe pas ikjes së Edi Ramës, Shqipërisë do t’i duhen përpjekje titanike për të çrrënjosur modelin kriminal që ka instaluar ai në Shqipëri dhe për të kuruar plagët e korrupsionit. Por rrugë tjetër nuk ka, tha ai duke përfunduar:
“Pastrimi i sistemit tonë politik, largimi njëherë e mirë i drejtimit kriminal të qeverisje, është shpresa dhe rruga e sigurtë për një Shqipëri që i takon të gjithë qytetarëve të saj.”
