I pandehur për lobimin në SHBA/ Reagimi, Lulzim Basha: Hetim politik!

Filloi si akuzë e Partisë Socialiste në pushtet, firma lobuese amerikane “Muzin Capitol Partners” thotë se ka marrë tre pagesa, në një shumë prej 675 mijë dollarësh për punën e saj në favor të Partisë Demokratike në vitin 2017, dhe kjo i mjaftoi Prokurorisë që të thirrë Kryetarin e PD, Lulzim Basha, si të pandehur për ti komunikuar zyrtarisht akuza ndonëse Partia Demokratike nuk e ka pranuar, pas daljes së tij publike sot kur e bëri të qartë se nuk ka për të bërë asnjë marrëveshje me Edi Ramën por opozita do të vazhdojë rrugën e protestave dhe ato do të jenë edhe më të fuqishme se kurrë.

Ndaj këtij veprimi të Prokurorisë, sot kur për përgjimet e publikuara për blerjen e votës nga ata që i fituan këto zgjedhje heshtet ndërkohë po kjo Prokurori heton për lobimin e humbësit të zgjedhjeve të vitit 2017, ka bërë që të reagon i pandehuri, Kryetari i PD, Lulzim Basha duke e konsideruar një hetim politik përmes të cilit Edi Rama ka menduar se do ta trembë atë apo do ta stepë opozitën:

“Mua nuk më bëhet vonë fare për këto akuza dhe këtë hetim politik. Edi Rama ka menduar se do të më trembë mua apo do të stepë opozitën, por do ta kuptojë shpejt se unë as nuk trembem dhe as nuk tërhiqem!”

Edi Rama ka një vit e gjysëm që mban si shpatë në dorë një hetim absurd, pa prova dhe pa asnjë fakt kundër Partisë Demokratike, thekson Lulzim Basha, dhe tani që është në dëshpërim për të larguar vëmendjen nga kriza politike dhe skandalet për bashkëpunimin me krimin për të vjedhur zgjedhjet, Edi Rama ka vendosur që të sajojë akuza absurde për të shpërqendruar publikun.

“Këto metoda alla Putin dhe Maduro, për t’u mbyllur gojën dhe neutralizuar kundërshtarët politikë dhe shkatërruar demokracinë, thjesht do ta thellojnë më shumë gropën ku ka rënë Edi Rama dhe do ta bëjnë të pashmangshëm dhe të shpejtë fundin e keq të tij. Edhe fundin e bashkëpunëtorëve të Edi Ramës, pa asnjë përjashtim, nga kriminelët e bandave deri tek prokurorët e kriminalizuar që i shërbejnë Edi Ramës,” konstaton Kryetari i Partisë Demokratike, Lulzim Basha, duke shtuar se sot shqiptarët e kuptojnë se sa të pambrojtur janë para krimit që është në pushtet, me një prokurori të mbushur me prokurorë politikë dhe të korruptuar, pa Gjykatë të Lartë, pa Gjykatë Kushtetuese, ndërkohë që Parlamenti  gjytyrym është i mbushur me politikanë të kriminalizuar ose përfaqësues direkt të krimit ndërsa përfundon:

“Ky është sistemi i kalbëzuar nga krimi dhe korrupsioni që ne duhet të shembim! Asnjë hap pas nga beteja jonë për zgjedhje të lira e të ndershme dhe për Shqipërinë si Europa!”

Reagimi:

Mua nuk më bëhet vonë fare për këto akuza dhe këtë hetim politik. Edi Rama ka menduar se do të më trembë mua apo do të stepë opozitën, por do ta kuptojë shpejt se unë as nuk trembem dhe as nuk tërhiqem!

Edi Rama ka një vit e gjysëm që mban si shpatë në dorë një hetim absurd, pa prova dhe pa asnjë fakt kundër Partisë Demokratike. Tani që është në dëshpërim për të larguar vëmendjen nga kriza politike dhe skandalet për bashkëpunimin me krimin për të vjedhur zgjedhjet, Edi Rama ka vendosur që të sajojë akuza absurde për të shpërqendruar publikun.

Këto metoda alla Putin dhe Maduro, për t’u mbyllur gojën dhe neutralizuar kundërshtarët politikë dhe shkatërruar demokracinë, thjesht do ta thellojnë më shumë gropën ku ka rënë Edi Rama dhe do ta bëjnë të pashmangshëm dhe të shpejtë fundin e keq të tij. Edhe fundin e bashkëpunëtorëve të Edi Ramës, pa asnjë përjashtim, nga kriminelët e bandave deri tek prokurorët e kriminalizuar që i shërbejnë Edi Ramës.

Shqiptarët tani po shohin fytyrën e vërtetë të prokurorisë politike të Edi Ramës: institucioni që ndihmon dhe mbron Edi Ramën, Olsi Ramën, Linda Ramën, Vangjush Dakon, Damian Gjiknurin, Taulant Ballën, Ulsi Manjën, Arben Ahmetajn, Qazim Sejdinin, Jurgis Çyrben, Ilir Ndraxhin, Elvis Roshin, Pjerin Ndreun dhe kriminelët e tjerë, që mbron qeveritarët e korruptuar deri në palcë, punon vetëm për të luftuar kundërshtarët politikë të regjimit dhe qytetarët që ngrenë zërin kundër tij.

Sot, shqiptarët e kuptojnë se sa të pambrojtur janë para krimit që është në pushtet: ka një prokurori të mbushur me prokurorë politikë dhe të korruptuar, nuk ka Gjykatë të Lartë, nuk ka Gjykatë Kushtetuese, ndërkohë që Kuvendi gjytyrym është i mbushur me politikanë të kriminalizuar ose përfaqësues direkt të krimit. Ky është sistemi i kalbëzuar nga krimi dhe korrupsioni që ne duhet të shembim! Asnjë hap pas nga beteja jonë për zgjedhje të lira e të ndershme dhe për Shqipërinë si Europa!