I refuzohet lista, reagon PD: Vendimi i KQZ i paligjshëm!

Pas vendimit të KQZ për t’i hequr 74 kandidatë nga listat e 25 prillit ka reaguar Partia Demokratike duke e konsideruar vendim të padrejtë dhe të paligjshëm, të diktuar nga interesat politike të mazhorancës ndërsa paralajmëron ankimim në të gjitha shkallët.

“Pasi ndryshoi rregullat e lojës në mënyrë të njëanshme, maxhoranca synon të imponojë rregulla të tjera, të cilat pamundësojnë përfaqësimin e plotë dhe të drejtë të të gjitha partive përbërëse të koalicionit tonë. Këto rregulla të njëanshme synojnë që të lënë të lënë të papërfaqësuara parti të cilat përfaqësojnë shtresa të ndryshme shoqërore dhe komunitete të caktuara, veçanërisht minoritetet,” thekson PD duke shtuar se asgjë nuk do ta ndalojë të sjell ndryshimin në Shqipëri me njerëzit e mrekullueshëm, që kanë nevojë dhe e duan kaq shumë ndryshimin ndërsa përfundon:

“Ne do ta bëjmë të mundur këtë në datën 25 Prill me ndihmën e të gjithë shqiptarëve.”

Ndryshe, në mbledhjen e sotme KQZ ka heqë 74 kandidatë nga lista e PD që kishte dërguar, pasi, duke iu referuar ligjit, thotë se ai lejon listë me vetëm153 kandidatë.

“Listat kanë më shumë kandidatë se sa përcaktohet, Elbasani ka 6 kandidatë më shumë, Dibra ka  3 kandidatë më shumë, Fieri ka 6 kandidatë më shumë, Berat ka 6 kandidatë më shumë, qarku i Durrësit ka 6 kandidatë më shumë, Korça ka 9 kandidatë më shumë, Kukësi ka 6 kandidatë më shumë, Qarku i Lezhës ka  3 kandidatë më shumë, Shkodra ka 9 kandidatë më shumë, Tirana ka 9 kandidatë më shumë, Vlora ka 6 kandidatë më shumë dhe Gjirokastra ka 9 kandidatë më shumë,” tha një përfaqësues i PD.

Deklaratë:

Vendimi i sotëm i KQZ për mosregjistrimin e plotë të listave të koalicionit është një vendim i padrejtë dhe i paligjshëm, i diktuar nga interesat politike të maxhorancës.

Pasi ndryshoi rregullat e lojës në mënyrë të njëanshme, maxhoranca synon të imponojë rregulla të tjera, të cilat pamundësojnë përfaqësimin e plotë dhe të drejtë të të gjitha partive përbërëse të koalicionit tonë. Këto rregulla të njëanshme synojnë që të lënë të lënë të papërfaqësuara parti të cilat përfaqësojnë shtresa të ndryshme shoqërore dhe komunitete të caktuara, veçanërisht minoritetet.

Asnjë vendimarrje e tillë nuk ka për të penguar koalicionin tonë që të garojë me potencialin e tij të plotë, njerëzor dhe programor. Kjo vendimarrje, si të gjitha vendimarrjet e padrejta, do të ankimohet menjëherë nga ana jonë në të gjitha shkallët ankimore.

Asgjë nuk do të na ndalojë të sjellim ndryshimin në Shqipëri me njerëzit tanë të mrekullueshëm, që kanë nevojë dhe e duan kaq shumë ndryshimin! Ne do ta bëjmë të mundur këtë në datën 25 Prill me ndihmën e të gjithë shqiptarëve.