I sekuestruar nga policia, ja sa do të shitet në ankand rezorti i njohur turistik…

Ministria e Financave ka nxjerrë në ankand një nga resortet më luksozë në jug të vendit, i sekuestruar si pasuri e vënë nga krimi.

Bëhet fjalë për resortin “Santa Quaranta” në pronësi të Klement Balilajt, të njohur si “Eskobari i Ballkanit”, person në kërkim ende.

Resorti luksoz “Santa Quaranta” është nxjerrë në shitje nga Ministria e Financave me një çmim fillestar të caktuar nga Agjencia prej 336 milionë lekëshë, afërisht 3 milionë dollarësh.

Në njoftimin e dhënë specifikohet se pasuria Bar-Restorant-Hotel “Santa Quaranta Premium Resort” ndodhet në vijën e parë të ndërtimeve në rrugën Sarandë -Butrint. Ky hotel është i përbërë nga 85 dhoma, kuzhina dhe bari. Hoteli është i kompletuar me të gjitha pajisjet dhe është i gatshëm për punë.