I shqetësuar, Vuçiç: Presidenti Trump mund të jetë i pranishëm në takimin e Washingtonit!

Presidenti i Serbisë, Aleksandar Vuçiç tha se bisedimet e delegacioneve të Beogradit dhe Prishtinës në Washington, ka shumë mundësi që do të mbahen më 3 dhe 4 shtator.

“Për shkak të mundësisë, por mos më mbani për fjalë, por thonë që ekziston mundësia që të paraqitet presidenti i SHBA-së Donald Trump, në rast se ne merremi vesh për diçka,” tha Vuçiç sot gjatë një interviste në Televizionin serb “Prva”.

Në konstatimin e gazetarit që presidenti amerikan, në rastin kur bëhet fjalë për vendet e vogla, paraqitet vetëm kur është diçka tejet e rëndësishme, Vuçiç tha se kjo e shqetëson.

Dje Vuçiç foli për mundësinë e shtyrjes së takimit në Washington, i paralajmëruar për 2 shtator, mirëpo nga Qeveria e Kosovës, po dje për RFE u shprehën se nuk kanë informacione nëse takimi do të shtyhet.

Këshilltari për media i kryeministrit të Kosovës, Xhavit Beqiri tha për RFE  se ende nuk ka ndonjë njoftim zyrtar për mundësinë e shtyrjes së takimit.

Ndryshe, I dërguari i Presidentit të SHBA, Donald Trump, për dialogun Kosovë-Serbi, Richard Grenell, më 14 gusht njoftoi se më 2 shtator, Kosova dhe Serbia do të takohen në Washington. Kësaj ftese iu përgjigjën pozitivisht pozitivisht kryeministri i Kosovës, Avdullah Hoti, dhe presidenti i Serbisë, Aleksandar Vuçiq.

Administrata amerikane ka konfirmuar për RFE se në këtë takim do të bisedohet për çështjet ekonomike.

Dialogu ndërmjet Kosovës dhe Serbisë, pas pothuajse 2 vjetësh ndërprerje, rinisi në Bruksel më 16 korrik të këtij viti. Ky proces ishte pezulluar në nëntor të vitit 2018, për shkak të një takse që Qeveria e Kosovës vendosi ndaj importeve nga Serbia. Kjo taksë më pas u zëvendësua me reciprocitet, por qeveria e kryeministrit Avdullah Hoti e hoqi reciprocitetin, me qëllim, që t’i jepet shans rinisjes së dialogut.